ҰҚҚ запастағы подполковнигі, жазушы Ғани Сихымовтың «Наш тренер» атты жаңа деректі-ғұмырнамалық кітабының салтанатты тұсаукесер рәсімі өтті, деп жазады облыстық спорт басқармасының баспасөз қызметі.
Жаңа туынды Қазақстанның еңбек сіңірген жаттықтырушысы, отандық ауыр атлетика спортының шыңын бағындырған аңыз тұлға Вилорий Викторович Пактың жарқын өмірі мен қажырлы еңбегіне арналған.
«Наш тренер» туындысы – тек бір спорт саңлағының басынан кешкендері ғана емес, бұл – үлкен спорттағы ірі жеңістер мен ауыр қиындықтардың, шынайы патриотизм мен ұстаздық жанкештіліктің шынайы шежіресі.
Өз ғұмырында Олимпиада ойындарының, Әлем және Азия чемпионаттарының талай жеңімпазын баптап шығарған Вилорий Пактың тұлғалық болмысы кітапта бірегей архивтік деректер мен шәкірттерінің шынайы естеліктері және тарихи сәттердің сипаттамалары арқылы өрнектелген.
«Бұл кітап – өз ісіне адал, Отан намысын бәрінен биік қойған ұлы Ұстазға деген құрмет. Вилорий Пактың өмір жолы – бүгінгі жас буын мен болашақ чемпиондар үшін таптырмас үлгі әрі сарқылмас мотивация көзі», — дейді автор Ғани Сихымов.
Аталған мәдени-рухани іс-шараға спорт саласының дамуына өлшеусіз үлес қосқан құрметті ардагерлер Юрий Ким, Абылай Жалдыбаев, Николай Некрасов, Садық Мұстафаев және халықаралық ареналарда көк туымызды желбіреткен Олимпиада чемпиондары қатысты.
Бағдарлама аясында кітаптың ресми лентасы қиылып, тұсауы кесілді. Іс-шара соңында кештің басты кейіпкері Вилорий Пак сөз алып, автор мен келген қонақтарға шексіз алғысын білдіріп, жүрекжарды жылы лебізін жолдады. Жаңа туынды отандық спорт тарихы мен өскелең ұрпақ тәрбиесіне қосылған құнды қазына ретінде бағаланды.
Пікірлер жоқ. Бірінші болыңыз!