АҚШ Сенаты Әсел Робертсті Америка Құрама Штаттарының Словения Республикасындағы төтенше және өкілетті елшісі қызметіне бекітті. Бұл тағайындаудың Қазақстан үшін де символдық мәні бар. Өйткені Әсел Робертс АҚШ дипломатиялық қызметінде осындай жоғары лауазымға көтерілген этникалық қазақ ретінде аталып отыр.
Робертстің кандидатурасын АҚШ президенті Дональд Трамп 2026 жылғы 11 ақпанда Сенат қарауына ұсынған. Сенаттың сыртқы қатынастар комитетіндегі ресми мәліметте оның Вирджиния штатынан ұсынылғаны және Словениядағы АҚШ елшісі қызметіне 2026 жылғы 14 мамырда бекітілгені көрсетілген.
Әсел Робертс Сенаттағы тыңдау кезінде өзінің Қазақстан аумағында, сол кездегі Кеңес Одағында дүниеге келгенін айтты. Оның айтуынша, 15 жасында АҚШ үкіметі қаржыландырған оқушылар алмасу бағдарламасы арқылы Аризона және Вермонт штаттарындағы мектептерде білім алған. Кейін жоғары оқуын да Америкада жалғастырып, кәсіби жолын АҚШ Мемлекеттік департаментімен байланыстырған.
Ол Мемлекеттік департаменттің протокол қызметінде жиырма жылға жуық жұмыс істеген. Осы кезеңде бірнеше президент әкімшілігі тұсындағы жоғары деңгейлі халықаралық кездесулерді, саммиттерді, мемлекеттік сапарларды және БҰҰ Бас Ассамблеясы аясындағы іс-шараларды ұйымдастыруға қатысқан. Бір жыл бойы АҚШ-тың Протокол қызметі басшысының міндетін атқарғаны да оның дипломатиялық тәжірибесінің бір бөлігі ретінде аталды.
Жаңа қызметінде Робертстің негізгі міндеті АҚШ пен Словения арасындағы саяси, қорғаныс және экономикалық байланысты күшейту болмақ. Сенаттағы сөзінде ол Словенияны АҚШ-тың маңызды досы әрі одақтасы деп атап, екі ел арасындағы әріптестікті тереңдетуге жұмыс істейтінін жеткізді. Оның айтуынша, бұл қызмет АҚШ мүддесін қорғаумен қатар, трансатлантикалық қауіпсіздік пен тұрақтылықты нығайтуға бағытталады.
Словения НАТО мен Еуропалық одақ құрамындағы мемлекет ретінде Вашингтон үшін Балқан аймағындағы тұрақтылық, еуроатлантикалық қауіпсіздік және өңірлік әріптестік тұрғысынан маңызды бағыттардың бірі саналады. Сондықтан Әсел Робертстің дипломатиялық миссиясы тек екіжақты қатынаспен шектелмей, АҚШ-тың Еуропадағы кеңірек саяси ұстанымымен де байланысты болмақ.
Пікірлер жоқ. Бірінші болыңыз!