Атырау облысында жыл басынан бері дропперлікке қатысты 45 дерек анықталған. Оның 11-і бойынша қылмыстық іс сотқа жолданды.
Жалпы өңірде интернет-алаяқтыққа байланысты 120 қылмыстық іс соттың қарауына жіберілген.
Полиция мәліметінше, алаяқтар тұрғындарды түрлі тәсілмен алдайды. Соның ішінде жалған интернет-дүкендер арқылы тауар сату, фишингтік сілтемелер жіберу, жеке деректерді қолға түсіру және өзін банк немесе құқық қорғау органы қызметкері ретінде таныстыру жиі кездеседі.
Киберқылмысқа қарсы іс-қимыл басқармасының жедел уәкілі Дәурен Мұханбетәлиевтің айтуынша, алаяқтар азаматтардан СМС-код сұрап, олардың атына несие рәсімдеуі мүмкін.
— Өздерін банк қызметкері немесе ішкі істер органдарының қызметкері ретінде таныстырып, қоңырау шалатын алаяқтар бар. Олар алдымен СМС-код сұрап, азаматтардың атына несие рәсімдетіп алады. Кейін ақша қаражатын дропперлер арқылы өздерінің криптовалюта есепшоттарына аудартады,— деді Дәурен Мұханбетәлиев.
Қазір полиция интернет-алаяқтықтың алдын алу, қылмысқа қатысы бар адамдарды анықтау және оларды жауапкершілікке тарту бағытындағы жұмыстарды жалғастырып жатыр.
Мамандар тұрғындарға күмәнді қоңырауларға сенбеуге, СМС-кодтарды бөтен адамға бермеуге және белгісіз сілтемелерге өтпеуге кеңес береді.
Пікірлер жоқ. Бірінші болыңыз!