Қарағанды сапары: Тоқаев Қарметтегі ауқымды өзгерістермен танысты

Президент Қасым-Жомарт Тоқаев 2 қарашада Қарағанды облысына жұмыс сапарымен барып, Теміртаудағы Qarmet металлургиялық комбинатының жұмысымен танысты. Мемлекет басшысына кәсіпорынға салынған инвестициялар, болат өндірісін ұлғайту жоспары және жаңа өндірістік кешендердің құрылысы туралы баяндалды, деп хабарлайды Halyqline.kz.

Президент алдымен комбинаттың конвертер цехын аралады. Мұнда домна пешінен алынған сұйық шойын болатқа айналып, кейін үздіксіз құю қондырғылары арқылы металл дайындамалары жасалады. Кәсіпорында 2024 жылы №1 және №2 конвертерлер күрделі жөндеуден өтіп, олардың корпустары жаңартылған. Бұл өндіріс көлемін арттыруға, өнім түрлерін көбейтуге және жабдықтардың сенімділігін күшейтуге бағытталған. Сонымен қатар бірқатар технологиялық үдерісті табиғи газға көшіру жұмыстары жалғасып жатыр.

Qarmet директорлар кеңесінің төрағасы Андрей Лаврентьев Президентке инвестициялық бағдарламаның орындалу барысын таныстырды. Оның мәліметінше, компания жұмыс істей бастағаннан бері өндірісті жаңғырту мен жаңа нысандар салуға 2,7 миллиард доллардан астам инвестиция жұмсалған. Биылғы жылдың қорытындысы бойынша кәсіпорын 4 миллион тонна болат, 3,6 миллион тонна көмір және 3,9 миллион тонна темір рудасы концентратын өндіруді жоспарлап отыр.

Мемлекет басшысы жылына 540 мың тоннадан астам дайын металл өнімін шығаруға есептелген жаңа сортты прокат цехының құрылысымен де танысты. Жобаның технологиялық серіктесі – қытайлық CERI компаниясы. Жаңа өндіріс орнында беріктігі жоғары А600 және А1000 санатындағы арматура, швеллер және басқа да металл бұйымдары шығарылады. Қазіргі уақытта технологиялық жабдықтарды орнату жұмыстары жүргізілуде. Кешенді 2026 жылдың соңына дейін пайдалануға беру жоспарланған.

Компанияның жалпы инвестициялық бағдарламасы 3,5 миллиард долларды құрайды. Оның аясында №8 және №9 кокс батареялары, сортты прокат кешені, мырыштау және полимерлі жабын желілері, сондай-ақ құю-илемдеу кешені салынып жатыр. Qarmet 2028 жылға қарай жылына 5 миллион тонна болат, 9 миллион тонна көмір және 5 миллион тонна темір рудасы концентратын өндіруге қол жеткізуді көздейді.

Президент Теміртаудың жаңаруы туралы айтты

Сапар барысында Қасым-Жомарт Тоқаев Теміртаудағы қалпына келтірілген трамвай жүйесімен де танысты. Мемлекет басшысы Республика даңғылынан «Инженер» аялдамасына дейін трамваймен жүріп өтті. Qarmet компаниясы 2024 жылы қайта жандандырған қоғамдық көлік қатынасы осы уақытқа дейін миллионнан астам жолаушы тасымалдаған. Қалада 30 шақырым трамвай жолы жаңартылып, сегіз жаңа вагон сатып алынған. Кәсіпорын қызметкерлері мен ардагерлері үшін жол жүру тегін.

Президент Qarmet басшылығымен әңгімесінде өндірісті дамытумен қатар Теміртауды абаттандыру мәселесіне де тоқталды.

— Шын мәнінде, Теміртау үшін трамвай – заманаларды байланыстыратын дәнекер іспеттес. Тұрғындардың трамвай қатынасын қалпына келтіру туралы талабын орындағаныңыз дұрыс болыпты. Комбинатқа алғаш келгеніңізде Теміртау қаласын абаттандырумен міндетті түрде айналысу қажет деп айтқан едім. Өйткені қала күтім көрмей, тозып кетті. Әлі де атқарылатын жұмыс көп, дегенмен бастамасы жақсы. Теміртау тұрғындары табиғи газбен қамтамасыз етілді. Байқауымша, халықтың көңіл-күйі көтеріңкі. Өйткені адамдар айналадағы оң өзгерістерді байқап, алғыстарын білдіруде. Еңбек ұжымының да көңіл-күйі айтарлықтай жақсарғаны байқалады. Ең бастысы, жағымды үдеріс бар. Біз комбинатты міндетті түрде прогресс пен табыстың символына айналдырамыз, тіпті оны өркендетеміз, – деді Қасым-Жомарт Тоқаев.

Айта кетейік, Мемлекет басшысы 2024 жылғы тамызда да Qarmet комбинатына барып, кәсіпорынды жаңғырту, өндірістік қауіпсіздікті күшейту және әлеуметтік мәселелерді шешу қажеттігін айтқан болатын. Сол кезде Президент комбинаттың бұрынғы өндірістік әлеуетін қалпына келтіру міндетін қойған.

Qarmet – Қазақстандағы толық өндірістік циклге ие ірі тау-кен металлургиялық кәсіпорындардың бірі. Компанияда шамамен 35 мың адам еңбек етеді. Оның 14 мыңнан астамы Теміртаудағы металлургия комбинатында жұмыс істейді. Сондықтан өндірісті жаңғырту бағдарламасының нәтижесі өңірдің өнеркәсіптік көрсеткіштерімен қатар мыңдаған жұмысшының еңбек жағдайына және Теміртаудың әлеуметтік инфрақұрылымына да байланысты.