Төретам кентінің әкімі Жамбыл Жұмабаев тағы да тәртіпсіздікке жол берді. Естеріңізде болса, газетіміздің алдыңғы сандарының бірінде кент әкімінің жергілікті кәсіпкермен жер бөлу мәселесі бойынша текетіресіп қалғанын айттық. ҚР Мемлекеттік қызмет істері агенттігінің Қызылорда облысындағы Әдеп жөніндегі кеңесі «қызметке толық сәйкес еместігі туралы ескерту» түріндегі тәртіптік жаза қолданған болатын. Арада көп уақыт өтпей кент әкімінің тағы бір «қисық» әрекеті көзге түсті. Бұл жолы автомобиль жолдарын жобалау, салу, реконструкциялау, жөндеу, күтіп-ұстау кезінде өрескел заңсыздықтарға жол берген.
Байқоңыр қаласының прокуратурасымен Қармақшы аудандық жергілікті атқарушы органдарымен 2018-2020 жылдарда және ағымдағы жылдың өткен кезеңінде автомобиль жолдарын жобалау, салу, реконструкциялау, жөндеу, күтіп-ұстау кезінде заңдылықтың сақталуына тексеру жұмыстары жүргізілген. Нәтижесінде Төретам кентіндегі А.Құнанбаев, Құлқашев, Ы.Жахаев және Нұртуған жырау көшелерінің автомобиль жолдарын орташа жөндеуге арналған техникалық құжаттаманың құнын арттыру фактілері анықталды. Мәселен, орташа жөндеуге арналған техникалық құжаттаманы әзірлеу кезінде құнын көтеру мақсатында жобалау ұйымдары автомобиль жолдарын салу және күрделі жөндеу кезінде пайдаланылатын сметалық нормалар мен бағалар негізсіз қолданылған. Жалпы, автомобиль жолдарын орташа жөндеуге мемлекеттік сатып алу туралы 3 шарт бойынша авторлық қадағалау қызметі үшін 458 955 (Құлқашев көшесіне 216927 теңге, А.Құнанбаев көшесіне 56364 теңге, Нұртуған жырау көшесіне 120200 теңге, Ы.Жахаев көшесіне 65464 теңге) теңге көлемінде артық шығындар есептеліп, негізсіз төленген (авторлық қадағалау тек жобалау-сметалық құжаттамаға ғана белгіленеді, ал орташа жөндеу кезінде авторлық қадағалау көзделмеген, техникалық құжаттама әзірленеді). Өз кезегінде, Төретам кентінің әкімі Жамбыл Жұмабаев (28.05.2020 жылғы өкімімен) жұмыс құны жоғарылатылған сметалық құжаттаманы негізсіз қабылдап, бекіткен, кейіннен жұмыстарды сатып алу кезінде пайдаланған.
Сондай-ақ, Төретам кентінің әкімі Жамбыл Жұмабаев автомобиль жолдарын орташа жөндеу жөніндегі жұмыстарды жеткізушілерге күтпеген (Құлқашев көшесіне 640102 теңге, А.Құнанбаев көшесіне 579578 теңге, Нұртуған жырау көшесіне 2463860 теңге, Ы.Жахаев көшесіне 671995 теңге) шығындар үшін – 2138061 теңге (шығындардың осы түрлері орташа жөндеу емес, құрылыс және күрделі жөндеу кезінде ғана есептеледі) негізсіз көрсетілген және арттыру коэффициенті 1,93 болып, техникалық қадағалау қызметі үшін негізсіз қолданылған (автожолдарды орташа жөндеу кезінде 1,5 арттыру коэффициенті қолданылмайды, тек құрылыс кезінде қолданылады) сметалық құжаттаманы өкімімен бекіткен.
Анықтама ретінде жеткізу қажет, Құрылыс және тұрғын үй-коммуналдық шаруашылық істері комитетінің 2017 жылғы 14 қарашадағы №249 бұйрығымен бекітілген Қазақстан Республикасындағы құрылыстың сметалық құнын анықтау жөніндегі осы нормативтік Құжатының 5-тармағының 2-тармақшасына сәйкес жоспарланбаған жұмыстар мен шығындар құрылыс, жаңарту және күрделі жөндеуге арналған жобалық-сметалық құжаттамаларында қарастырылуы тиіс. Бұл ретте «Автомобиль жолдары туралы» заңының 14-бабының 4-тармағына сәйкес, автомобиль жолдарын орташа жөндеу кезінде жоспарланбаған жұмыстар мен шығындар көздемейтін техникалық құжаттама (сметалық есеп, ақаулы актілер) ғана жасалады. Дегенмен, аталған нормаларға қарамастан, жоғарыдағы көшелердегі орташа жөндеу жұмыстары қабылдау актісі арқылы қабылданып, пайдалануға берілген.
Қызылорда облысы бойынша ішкі мемлекеттік аудит департаменті Қармақшы ауданы, Төретам кентіндегі А.Құнанбаев, Құлқашев, Ы.Жахаев және Нұртуған жырау көшелеріне жүргізілген орташа жөндеу жұмыстары бойынша қаржылық бұзушылықтары 458955 теңгеге және процедуралық бұзушылықтар 1988,1 мың теңге болғандығын нақтылап отыр. Нәтижесінде кент әкімі атқаратын қызметінен босату шешімі қабылданды.
Мұнымен қоса, Жаңақорған ауданының жер қатынастары бөлімінің басшысы Нұржан Шазиндаұлы Қарақожаевтың әрекетіне қатысты қызметтік тергеп-тексеру жүргізілген. Нәтижесінде Н.Ш.Қарақожаевтың түсінігін тыңдап, оның тарапынан шешімдерді дайындау мен қабылдау кезінде құқыққа сыйымсыз қолдау көрсетуі байқалмауына байланысты мемлекеттік қызметке кір келтіретін теріс қылық болмаған деп тауып, тәртіптік істі тоқтату шешімі қабылданды.
Мемлекеттік қызметте жаза басу жақсылыққа жетелемейді. Сондықтан атқарған іске тиянақты болып, заңға бағына отырып қызмет етуге тырысқан жөн. Өңірдегі кейбір басшылардың осындай бассыздықтарға жол беріп жүргенін Әдеп кеңесі өткізілген сайын куә болып жатамыз. Жұрт мемқызметкерге қарап бой түзейді деп ойлаймыз. Бірақ мынадай әрекеттерден кейін оларға қарап бой мен ой түзеу қиындай түсетіндей.
Әйгерім НАЖМАДИНҚЫЗЫ
Пікірлер жоқ. Бірінші болыңыз!