Halyqline.kz – үздіктер қатарында!

Ой ұшқындары

17.09.2020, 10:30 374

Тасбақадан тұлпар тумайды,

Шымшықтан сұңқар тумайды.

***

Сұлу жыр – сөздің құрты,

Сұлу әйел – көздің құрты.

***

Арлы адамның қамын жеген озады,

Жарлы адамның нанын жеген тозады.

***

Махаббат – лаулаған от.

Ол отқа ақылды да, ақымақ та қанатын күйдіреді.

***

Атқа мінгеннің бәрі ақылды емес,

Жаяу жүргеннің бәрі ақымақ емес.

***

Әкім болу – әмірдің күші,

Ақын болу – Тәңірдің ісі.

***

Мансап – бүгіндік мұрат,

Оның жолы қысқа.

Талант – ғұмырлық мұрат,

Оның жолы ұзақ.

***

Әкім – жұртының серкесі,

Ақын – ұлтының еркесі.

***

Атақ-даңққа бас ұрған,

ұлы болмайды.

Ақылдыға бас ұрған,

ешкімнің құлы болмайды.

***

Ағайын бірлігімен мықты,

Кәсіпкер тірлігімен мықты.

***

Көп білемін деу – көзсіздік,

Елдің етегінде отырып,

Төріне шығамын деу – тексіздік.

***

Сұлудың түрі жақсы,

Сәбидің тілі жақсы.

***

Жүйрік болатын құлын жабағысында бесті  болады,

Азамат  болатын  жігіт  қаршадайында  есті болады.

***

Қатынның еркелігі – әсемдігі,

Ақынның еркелігі – шешендігі.

***

Мен адамның шені мен шекпенін емес,

Қарапайым кісілігін бағалаймын.

***

Біз – тірісін өлтіре алмай,

Өлісін тірілте алмай жүрген қазақпыз.

***

Біз маңыратып мал ұстамаймыз,

Жалындатып жыр ұштаймыз.

… Ара-тұра сыздықтатып сыра ұрттаймыз.

***

Көнебөген, Көнебөген,

Мен саған неге келем?!

Он ойланып, жүз толғанып,

Темекімді шеге берем…

***

Өзіңе сырым мәлім, жырым мәлім,

Жүрегім өрт,

Түнерген түрім жалын.

Аққа жағын білемін Алла дәйім,

Жантық болып кеттің бе, бүгін бәрің?!

***

Парасатты адам көпшіл болады,

Парықсыз адам кекшіл болады.

Толыбай   АБЫЛАЕВ

Пікірлер жоқ. Бірінші болыңыз!

Пікір жазыңыз

Тағы да оқыңыз: