Бүгін Арал аудандық орталық кітапхананың ұйымдастыруымен 23 сәуір – Ұлттық кітап және кітапханашылар күні аясында «Кітап шоу – 2026» кітап фестивалі өтті, деп жазады аудан әкімінің баспасөз қызметі.
Кітаптың құны мен кітапханашының мәртебесін көтерген ауқымды іс-шараға ауданның зиялы өкілдері, ақындар мен жазушылар, кітапхана саласының ардагерлері және кітапхана оқырмандары қатысты.
Аталған мереке аясында өткізілген бұл шараның басты мақсаты – оқырман мәдениетін дамыту, кітапқа деген қызығушылықты арттыру және қоғамда кітапхананың рөлін насихаттау.
Фестиваль барысында «Кітап – мәңгілік мұра» кітап көрмелері, «Жасанды интеллект және кітапхана» жаңа кеңістік алаңы ұйымдастырылып, оқырмандар назарына жаңа әдебиеттер мен интеллектуалды ойындар ойнатылды.
Кітап фестивалінің екінші бөлімі «Әлемнің кілті – кітапта, ал кілт иесі – кітапханашы» атты мерекелік кешпен жалғасты.
Фестиваль аясында кітапхана қызметкерлерінің еңбегі де ерекше атап өтіліп, үздік кітапханашылар марапатталды. Бұл – кітапханашылардың қоғамдағы маңызын арттырып, олардың кәсіби еңбегіне көрсетілген құрметтің белгісі.
Ұлттық кітап пен кітапханашылар күніне арналған бұл фестиваль – рухани жаңғыруға бағытталған, оқырман мен кітапты тоғыстырған маңызды мәдени іс-шаралардың бірі. Кітапсүйер қауым үшін бұл күн ұмытылмас әсерге толы мерекеге айналды.
Пікірлер жоқ. Бірінші болыңыз!