Кино мен телесериал – тек ойын-сауық емес, қоғамның айнасы, уақыттың рухани хроникасы. Соңғы онжылдықта сериал индустриясы ерекше серпін алып, көрерменді эстетикалық, эмоционалдық және интеллектуалдық тұрғыда байыта алатын туындылар дүниеге келе бастады. Бұл саладағы бәсекенің күшеюі, режиссерлер мен сценаристердің шеберлігі, актерлік құрамның қуаты – барлығы біріге отырып, культтік деңгейге көтерілген сериалдарды қалыптастырды. Көпшілік үшін осы сапаны бағалайтын негізгі платформа – IMDb (Internet Movie Database) сайты. Миллиондаған қолданушы дауыс беру арқылы фильмдер мен сериалдардың орташа рейтингін қалыптастыратын бұл ресурс – бүгінде әлемдегі ең ықпалды кино платформаларының бірі.
IMDb сайтындағы рейтинг белгілі бір фильмнің немесе сериалдың көрермен көңілінен қаншалықты шыққанын ғана емес, оның өнер ретіндегі мәнін, әсерін де байқатады. Сонымен, IMDb тарихында ең жоғары баға алған, сыншылар мен көрермендердің бірдей мойындауына ие болған 7 үздік сериал тізімін ұсынамыз.
1. Breaking Bad (2008–2013)
IMDb рейтингі: 9.5/10
Қылмыс пен драма жанрын шебер тоғыстырған бұл сериал – заманауи теледидар өнерінің эталоны саналады. Сюжетте мектептегі химия пәнінің мұғалімі Уолтер Уайт қатерлі ісікке шалдыққанын білген соң, отбасын материалдық жағынан қамтамасыз ету үшін метамфетамин жасап сата бастайды. Бірақ бұл шешім оның тағдырын ғана емес, айналасындағы бүкіл әлемді өзгертіп жібереді. Винс Гиллиган түсірген бұл туынды мораль, адамгершілік, ерік пен билік тақырыптарын терең қозғайды.
2. Band of Brothers (2001)
IMDb рейтингі: 9.4/10
Екінші дүниежүзілік соғыс тақырыбына арналған бұл мини-сериал HBO арнасынан көрсетіліп, шынайылық пен тарихи дәлдігімен ерекшеленді. Оқиға шынайы оқиғаларға негізделген: америкалық «Easy Company» атты ротаның Еуропадағы соғыс кезіндегі тағдырын баяндайды. Стивен Спилберг пен Том Хэнкс продюсерлік еткен бұл туынды әскери драмалар арасында биік мәртебеге ие.
3. Chernobyl (2019)
IMDb рейтингі: 9.3/10
Совет дәуіріндегі ең ірі техногендік апат – Чернобыль атом электр станциясындағы жарылыс туралы 5 бөлімнен тұратын мини-сериал. HBO түсірген бұл туынды тек апаттың шынайы сәттерін емес, жүйенің үнсіздігін, бюрократиялық көзбояушылықты, адамзаттың жауапкершілігі мен шындықтың салмағын суреттейді. Әр эпизоды көрерменді сілкіп, экран алдына байлап қояды.
4. The Wire (2002–2008)
IMDb рейтингі: 9.3/10
Балтимор қаласындағы есірткімен күресті негізге алғанымен, бұл сериал тек полиция мен қылмыскерлердің текетіресін ғана көрсетпейді. Ол – жүйелік проблемалар, саясат, мектеп, журналистика, заң мен әділет арасындағы шекараны зерттейтін әлеуметтік драма. Шынайылығы мен реалистік тәсілі арқасында «The Wire» АҚШ теледидарындағы ең терең сериалдардың бірі ретінде бағаланады.
5. Game of Thrones (2011–2019)
IMDb рейтингі: 9.2/10
Фэнтези жанрындағы жаһандық феноменге айналған бұл сериал Джордж Р.Р.Мартиннің «Мұз бен от әні» роман циклінің негізінде түсірілді. Тақ үшін күрес, опасыздық, батырлық пен өлім, махаббат пен кек – бұл сериалда бәрі бар. Алғашқы маусымдары тарихи-эпикалық масштабпен, күрделі кейіпкерлермен, күтпеген сюжет бұрылыстарымен есте қалды. Соңғы маусымы сынға ұшырағанымен, сериал жалпы рейтингі мен ықпалы жағынан ең үздіктер қатарында.
6. The Sopranos (1999–2007)
IMDb рейтингі: 9.2/10
Классикалық мафия жанрын қайта жандандырған туынды. Бас кейіпкер Тони Сопрано – Нью-Джерсидегі қылмыстық топтың жетекшісі, бірақ психотерапевттің көмегіне жүгініп, ішкі күйзелістерімен күреседі. Бұл сериал адам психологиясы мен қылмыс әлемін бұрын-соңды болмаған шынайылықпен қатар алып жүре алды. Қылмыс пен отбасылық өмірдің арасы бұрын-соңды мұншалықты жіңішке көрінбеген.
7. Sherlock (2010–2017)
IMDb рейтингі: 9.1/10
Артур Конан Дойлдың атақты детективі Шерлок Холмс – заманауи Лондонда. Бенедикт Камбербэтч сомдаған Холмс – технологияны шебер пайдаланатын, IQ-і шексіз, эмоционалды түрде күрделі кейіпкер. Бұл сериал британдық классиканы жаңа буынға жаңа стильде жеткізді. Әрбір эпизоды – толық метражды фильм деңгейіндегі сапа мен драматургия үлгісі.
Сурет ашық дереккөзден алынды.
Пікірлер жоқ. Бірінші болыңыз!