Университет десе, көпшіліктің ойына бірден заң, медицина немесе математика сияқты дәстүрлі пәндер оралады. Бірақ әлемнің кейбір жоғарғы оқу орындары студенттерін таңғалдырып қана қоймай, күлкіге қалдыратын ерекше курстар ұсынады. Бұл пәндер тек қана ойын-сауық үшін емес, ғылымды жеңілдетіп, қызықты етіп жеткізудің тапқыр тәсілі ретінде қабылданады.
Балмұздақ арқылы химияны үйрену
АҚШ-тың Корнелл университетінде студенттерге «Ice Cream Science» атты ерекше курс ұсынылады. Мұнда болашақ ғалымдар мен инженерлер химия заңдылықтарын тәжірибе жүзінде, яғни түрлі дәмдегі балмұздақ жасау арқылы зерттейді. Тәтті әрі танымдық пәнге сұраныс өте жоғары.
Гарри Поттер ғылымға жол ашады
Ұлыбританиядағы Саутгемптон университетінде «The Science of Harry Potter» атты курс бар. Оқытушылар сиқырлы әлемдегі құбылыстарды физика заңдарымен түсіндіруге тырысады. Мәселен, метламен ұшу, көрінбеу қабы немесе сиқырлы зельелердің химиялық негіздері.
Ниндзя – тек аңыз емес
Жапониядағы Киото университеті «Ниндзя тарихы және мәдениеті» атты пәнді студенттерге ұсынады. Курс барысында ортағасырлық жапон жауынгерлерінің өмір салты, әскери тактикасы, рухани мәдениеті қарастырылады. Ниндзя жайлы миф пен шындықтың айырмашылығы да осы жерде талқыланады.
Шарап мәдениетінің сыры
Италиядағы Флоренция университетінде «Wine Tasting and Culture» атты курс бар. Студенттер әртүрлі шараптың дәмін татып қана қоймай, олардың шығу тарихын, аймақтық ерекшеліктерін зерттейді. Бұл – гастрономия мен тарихты үйлестірген ерекше бағыт.
Симпсондар және философия
АҚШ-тың Калифорния университетінде «The Simpsons and Philosophy» атты пән бар. Танымал мультсериал кейіпкерлері арқылы студенттер Сократтан бастап Ницшеге дейінгі философиялық идеяларды талдайды. Қарапайым көрінетін күлкілі оқиғалар терең ойға жетелейтіні қызық.
Дайындаған А.ЖАЙШЫЛЫҚ
Сурет ашық дереккөзден алынды.
Пікірлер жоқ. Бірінші болыңыз!