Қазақтың көрнекті ақыны, жазушысы, қоғам қайраткері Мұхтар Шахановтың жансақтау бөліміне түскені белгілі болды. Бұл туралы Мұхтар Шаханов қорының төрағасы Нұржігіт Ысқақ мәлімдеді. Ақпаратта ақынның жағдайы ауыр екені айтылған.
«Құрметті Қазақ Елі! Халқымыздың қаһарман ақыны, әрі жазушысы, ұлт үшін жанын аямай тер төккен азаматы Мұхтар Шахановты білмейтін қазақ кем де кем. Тек қазақ қана емес, бүкіл түркі әлеміне мойындатқаны да шындық. Кеңестік жүйенің қылышынан қан тамып тұрған кезеңнің өзінде басын бәйгеге тігіп, Кремль төрінде Желтоқсан оқиғасын әлемге паш еткенінің өзі көп нәрсені аңғартады. Оның елге сіңірген еңбегін санап тауысу мүмкін емес. Қазір көкеміз 84 жасқа келді. Алайда денсаулығы сыр беріп, жансақтау бөлімінде жатыр. Ендеше, құрметті халайық, көкеміздің тез сауығып, ортамызға оралуы үшін дұға жасап қояйық», – деп жазды ол.
Қоғамда үлкен құрметке ие қаламгердің денсаулығына қатысты бұл хабар көпшілікті алаңдатып отыр. Мұхтар Шаханов – қазақ әдебиеті мен руханиятында өзіндік орны бар тұлға. Ол поэзия, публицистика және қоғамдық қызмет арқылы ел өміріндегі бірқатар маңызды мәселеге үн қатып, ұлт руханиятының биігінен көрініп келген қайраткер ретінде белгілі. Бұл тұрғыдан алғанда, оның денсаулығына қатысты қандай да бір мәлімет жұрт назарынан тыс қалмайды.
Қазіргі таңда ақынның денсаулық жағдайына байланысты ресми мәлімет шектеулі. Ашық дереккөзде оның жансақтау бөлімінде жатқаны және бұл жөнінде Мұхтар Шаханов қорының төрағасы Нұржігіт Ысқақ хабарлағаны ғана көрсетілген. Қосымша медициналық қорытынды немесе емдеу барысына қатысты нақты ақпарат әзірге жарияланбаған.
Фото: instagram.com/aigerim.abzhan
Пікірлер жоқ. Бірінші болыңыз!