Оралшы адами кейіпке,
Пір тұтып, табынба ғайыпқа:
Бұл Өмір айналды Фейкке,
Бұл Өмір айналды Хайпқа!
Ойлай ма осы жұрт жат қамын?
Шындықтың бағасын жай ұқтың:
Білгейсің, алданып жатқаның —
Арқасы Фейк пен Хайптың.
Ақиқат – шындықтың түбінде,
Мессенджер — бүгінде мекенің:
Қоғамдық сана да бүгінде
Қолында хайпкер жекенің.
Фейктер улады сананы,
Өсекті шындықтай жайыпты ел:
Өтірік өлтіріп барады —
Хайпкер бәріне айыпкер!
Жұртым-ау, жағдайың жаңаша,
Смартфонға назарың ауыпты:
Мүмкіндік дегенің — тамаша,
Өтірік, дегенмен, қауіпті!
Ақиқат – шындыққа араша,
Жалған сөз оларға жауықты:
Еркіндік дегенің — тамаша,
Ессіздік, дегенмен, қауіпті!
Керек-ау заманмен ұғыныс,
Қалады осындай кейіпті ел:
Хайптар – ең басты құбылыс,
Фейктер – ең басты кейіпкер!
Жасанды екен-ау кей ықпал,
Артынан тағылар айыптар:
Хайптың артында Фейк бар,
Фейктің артында Хайп бар.
Өсектеп, «төсек» деп жарадың!
Дау-дамай сорақы, дарақы:
Хайп ол, алдымен, таралым,
Таралым беретін жалақы.
Ұзын тіл билеген келтені,
Фейкке жыртылдық, іркілдік:
Тұтастай қоғамның ертеңі
Қолында Хайптың бір күндік.
Қаңқу сөз бүгінде күшінде,
Құбылған аты мен заты мың:
Алданбай қалуың үшін де
Керек-ау білім мен ақылың!
Ғаламтор – ақпарат аумағы,
Жаярың болса егер – жайып тын!
Бүгінде әлемді жаулады,
Вирусы Фейк пен Хайптың.
Бүгінде сананы жаулады
Вирусы Фейк пен Хайптың.
Сатылып Самарқан бөзіне,
Біреулер өлтірді талабын.
Кей кезде: «Адамның өзі де —
Бірыңғай фейк», — деп қаламын.
Кей кезде: «Өмірдің өзі де —
Біртұтас хайп», — деп қаламын…
Әміржан ҚОСАН
Суретті салған ЖИ
Пікірлер жоқ. Бірінші болыңыз!