Жаңа оқу жылының алғашқы күні Жаңақорған ауданының білім саласы үшін айтулы жетістікпен басталды, деп жазады аудан әкімінің баспасөз қызметі.
Аудандағы №286 мектеп-лицейі «Орта білім беретін үздік ұйым» грантының облыстық деңгейдегі жеңімпазы атанды. Осыған орай «Білім көшбасшысы – аудан мақтанышы» атты салтанатты іс-шара ұйымдастырылып, білім ордасының жетістігі кеңінен атап өтілді.
Салтанатты іс-шарада аудан әкімі Жарқынбек Ғалымжан №286 мектеп-лицейінің ұжымын айтулы жетістігімен құттықтап, білім саласындағы еңбектеріне жоғары баға берді. Жеңімпаз мектепке білім ордасының материалдық-техникалық базасын жетілдіруге және білім беру сапасын одан әрі арттыруға бағытталатын 1 миллион теңге көлеміндегі сертификат табысталды.
Іс-шара барысында аудандық ардагерлер кеңесінің төрағасы Өмірсерік Тақырбасов пен ардагер-ұстаз Шолпан Мажитова мектеп ұжымына ақжолтай тілектерін арнап, бата берді. Сонымен қатар кеш қонақтарына мектеп-лицейінің жетістіктері мен оқушыларының арнайы бейнеқұттықтауы ұсынылды.
№286 мектеп-лицейінің бұл жеңісі – ұстаздар еңбегінің, шәкірттер жетістігінің және білім сапасын арттыру бағытындағы жүйелі жұмыстың жарқын нәтижесі.
Білімді ұрпақ – ел болашағы. Білім саласындағы әрбір жетістік – ауданның абыройы мен ортақ мақтанышы.
Пікірлер жоқ. Бірінші болыңыз!