Halyqline.kz – үздіктер қатарында!

Қызылордада өңдеу өнеркәсібі 10,7 пайызға өсті

17.11.2026, 14:00 98

Облыс әкімі Мұрат Ергешбаев жыл соңына дейін жоспарланған инвестициялық жобаларды іске қосып, мемлекеттік сатып алуда жергілікті кәсіпорындардың өнімдеріне басымдық беруді тапсырды, деп хабарлайды Halyqline.kz.

17 қарашада Премьер-министр Олжас Бектеновтің төрағалығымен өткен Үкімет отырысында отандық өндірісті дамыту және тауар өндірушілерді қолдау мәселелері қаралды. Жиынға Қызылорда облысының әкімі Мұрат Ергешбаев селекторлық режим арқылы қатысты. Үкімет отырысынан кейін аймақ басшысы жауапты сала жетекшілерімен мәжіліс өткізіп, өңірдегі өндірістік жобалардың орындалу барысы мен кәсіпкерлерді қолдау шараларын талқылады.

Облыс әкімінің мәліметінше, биылғы он айда Қызылорда өңірінің өңдеу өнеркәсібінде 10,7 пайыздық өсім қалыптасқан. Аймақ басшысы бұл көрсеткішті одан әрі арттыру үшін экономиканы әртараптандырып, жергілікті кәсіпорындардың өндірістік мүмкіндігін кеңейту қажеттігін атап өтті. Әсіресе жоспарланған инвестициялық жобалардың жыл соңына дейін толық іске қосылуына баса назар аударылды.

— Өңдеу өнеркәсібі – облыс экономикасының негізгі көрсеткіштерінің бірі. Президентіміз Қасым-Жомарт Кемелұлы өз Жолдауында жекелеген салаға немесе бір кәсіпорынға тәуелді болмай, негізгі өндірістердің айналасында толыққанды біртұтас жүйе құрудың маңыздылығын атап өткен болатын. Сондықтан өңір экономикасын әртараптандыру, өндірістік әлеуетті арттыру және отандық тауар өндірушілерге қолдау көрсетуіміз қажет, – деді Мұрат Ергешбаев.

Әкім қала және аудан басшыларына жоспарланған инвестициялық жобалардың белгіленген мерзімде іске қосылуын қамтамасыз етуді тапсырды. Сонымен қатар бюджеттік бағдарлама әкімшілеріне мемлекеттік және квазимемлекеттік сектордағы сатып алу кезінде заңнама талаптарын қатаң сақтау міндеті жүктелді.

Мұрат Ергешбаев жергілікті кәсіпорындардың мемлекеттік тапсырыстарға қатысу мүмкіндігін кеңейту керектігін де айтты. Оның сөзінше, сатып алу рәсімдерінде заңнама аясында отандық тауарларға, соның ішінде Қызылорда облысында өндірілетін өнімдерге басымдық берілуі тиіс. Бұл жергілікті кәсіпкерлер үшін тұрақты өткізу нарығын қалыптастыруға және өндіріс көлемін ұлғайтуға мүмкіндік бермек.

Мәжілісте шағын және орта кәсіпкерлікті қолдау мәселесі де назардан тыс қалған жоқ. Облыста жұмыс істейтін қаржы институттарының мүмкіндіктерін пайдаланып, кәсіпкерлердің жаңа жобалары мен бастамаларына қолдау көрсету тапсырылды. Әсіресе өндірісті кеңейтуге, жаңа жұмыс орындарын ашуға және өңір экономикасының белсенділігін арттыруға бағытталған жобаларға көңіл бөлінбек.

Бұдан бөлек, жиында әлеуметтік маңызы бар азық-түлік тауарларының бағасын тұрақтандыру мәселесі қаралды. Қазіргі уақытта тұрақтандыру қорының өнімдері облыс аумағындағы 36 әлеуметтік дүкен мен бес ірі сауда үйіндегі әлеуметтік бұрыш арқылы сатылып жатыр.

Аймақ басшысы қала және аудан әкімдеріне тұрақтандыру қорынан жеткізілетін азық-түлік бағасының белгіленген деңгейден ауытқымауын бақылауды тапсырды. Сондай-ақ облыс және аудан орталықтарында ауыл шаруашылығы жәрмеңкелерін ұйымдастыру жұмыстарын жалғастыру қажеттігі айтылды.

Осылайша, өңірде жыл соңына дейін инвестициялық жобаларды аяқтау, жергілікті тауар өндірушілерді қолдау және әлеуметтік маңызы бар азық-түлік бағасын бақылау негізгі міндеттердің қатарында болмақ.

Пікірлер жоқ. Бірінші болыңыз!

Пікір жазыңыз

Тағы да оқыңыз: