Ақмола облысында болған көлік апатынан әнші, асаба Асқар Дүйсенов қаза тапты, – деп хабарлайды halyqline.kz тілшісі El.kz ақпарат агенттігіне сілтеме жасап.
Әлеуметтік желілерде әншінің әріптестері мен достары марқұмның отбасы мен туғандарына көңіл айтып жатыр.
Асқар Дүйсеновті ақтық сапарға шығарып салу рәсімі 2 наурыз күні әншінің туған жері – Солтүстік Қазақстан облысының Кішкенекөл ауылында өтеді.
Ақмола облысы ПД-ның хабарлауынша, жол-көлік оқиғасы 28 ақпанда Астана-Петропавл трассасының 31-ші шақырымында болған. “Газель” мен Volkswagen Polo көліктері соқтығысып, соның салдарынан жеңіл көліктің жүргізушісі қаза тапқан.
Адам өліміне әкеліп соқтырған жол апатына байланысты сотқа дейінгі тергеу басталды. Оқиғаның мән-жайы анықталып, процестік шешім қабылданды.
Полиция департаменті жүргізушілерге жылдамдықты шектен тыс асырмауды, жол жағдайын және көлік құралының техникалық жағдайын бақылауда ұстауды ескертеді.
Пікірлер жоқ. Бірінші болыңыз!