«Қармақшы ауданында өнімділігі жылына 1500 тонна тауық етін өндіретін құс фабрикасы» жобасын (құны – 3 млрд теңге) іске асыратын «Қармақшы құс» ЖШС директоры Н.Іздібаев бұған дейін Қызылорда облысы прокуратурасының фронт-офисіне оның нысанын сумен жабдықтау жүйесіне қосу кезіндегі кедергілер туралы хабарлаған болатын.
Инвестициялық жобаларды сүйемелдеу жөніндегі фронт-офистің кезекті отырысында Н.Іздібаев прокуратураға алғыс айтып, қадағалау органының тікелей араласуынан кейін нысан сумен жабдықтау жүйесіне қосылып, құс фабрикасы толығымен іске қосылғанын хабарлады.
Фронт-офистің жұмысы инвестициялық жобалардың кедергісіз іске асырылуын, оларды прокуратура тарапынан сүйемелдеуін, инвесторлар алдындағы кедергілерді анықтау және жою мәселелерін қамтитыны хабарланады.
Қабылданған шаралардың жеделдігі үшін фронт-офис жұмысына облыс әкімінің бірінші орынбасары, сыбайлас жемқорлыққа қарсы іс-қимыл, Ұлттық қауіпсіздік, қаржы мониторингі департаменттерінің басшылары, «Атамекен» кәсіпкерлер палатасы, «Kazakh invest «Ұлттық компаниясы» АҚ өңірлік басшылығы, сондай-ақ бизнес өкілдері қатысады.
Бүгінгі таңда облыста 2026 жылға дейін қосылуы көзделген өндіріс саласындағы Индустрияландыру картасына енгізілген 31, жалпыұлттық бірегей пулында қаралған 46 инвестициялық жобаны салу жоспарланса (13-і индустрияландыру картасына енгізілген), оның ішінде 3-еуін осы жылы іске қосу белгіленген.
Сондай-ақ, кеңесте фронт-офис жұмысының мақсаты мен тәулік бойы сүйемелдеу жүргізудің тәртібі түсіндірілді.
Қызылорда облысының прокуратурасы
Пікірлер жоқ. Бірінші болыңыз!