— Қазақ баланы санамайды және санын айтпайды.
— Қалжа жемеген әйелдің баласы ынжық, болбыр, икемсіз болып өседі.
— Баланы бесікке саларда ешкім сөйлемейді. Егер біреу сөйлеп қойса, бала жылауық, өскенде өсекші болады.
— Сәби шалқасынан жатып башайын тістесе, оны «үйірін шақырып жатыр» деп ырымдайды. Яғни, оның соңынан тағы бір бала келеді деген ұғым бар.
— Сәбидің қырқынан шыққанда қарын шашын алмаса қарғысы қатты болады.
— Балаға қарғыс өтпеу үшін оны үш кемпірдің бұтынан өткізіп алады.
— Үйге кіріп келе жатқан бала есік алдына құлап қалса – үйге береке, ырыс, байлық келеді. Оны төрге апарып үш рет аунатады.
— Жүкті әйел шашын кессе – іштегі бала кемтар болып туады, бақыты кесіледі.
— Сәби шалқасынан жатып ұйықтаса – елге белгілі азамат болып өседі, бүк түсіп ұйықтаса- уайымшыл, жігерсіз болып шығады, етпетінен жатып ұйықтаса ойшыл болады.
— Балаға асық етін мүжітпейді. «Алты жыл аш болсаң да, асық етін мүжіме» деген бар.
— «Бойы өспей қалады» деп жас балаға бұғана ұстатпайды.
— Қыздың басына ақ, қара орамал тартпайды. Ақ – жаулықтың, қара – қайғының белгісі.
— Есіктің тұтқасын жуған сумен көз тиген баланың бетін, екі алақанын, екі табанын жуса тәуір болып кетеді.
— Қалы үлкейіп кетпесін деп, қалымен туған балаға «Қалдыгүл, Қалдыбай» деп ат қояды.
— Әйел итке тас лақтырса – үйдің ырысы кетеді, әйелдің бағы қайтады.
— Аты сүріншек болады деп балаға төстің сүріншегін жегізбейді.
— Жеңілтек болады деп қыз баланы қырқынан ерте шығармайды.
— Келін атасы мен енесінің төсегіне отырмайды.
— Толғағы қатты болады деп екіқабат келіншекке толарсақ жегізбейді.
— Жас босанған әйел 40 күнге дейін қолын суық суға малса – баласы тасбауыр болады.
— Бөбек мезгілінде еңбектемесе – оның бауырынан тағам толы табақ өткізеді, сонда тез еңбектеп кетеді.
— Сәбидің тілі мезгілінде шықпаса – нағашысының үйіне апарып, бір қойды сойдырып, соның көтеншегімен буындырады…
Пікірлер жоқ. Бірінші болыңыз!