Бішкекте еркін күрестен өткен біріншілікте отандастарымыз 1 алтын, 2 күміс, 1 қола жүлде еншілеп, жалпыкомандалық есепте чемпионатты 4-орынмен тамамдады. Дәлірек айтсақ, 57 келі салмақта Мейрамбек Қартбай қола жүлде, 61 келі салмақта сынға түскен Асыл Айтақын мен 97 келі салмақта белдескен Ризабек Айтмұхан күміс, ал жалғыз алтын медальді 86 келіде сынға түскен Азамат Дәулетбеков еншіледі. Әрине, нәтиже былтырғыға қарағанда нашар. Дегенмен, Бішкектегі чемпионатқа еліміздің 2-3-ші нөмірлі балуандардың қатысқанын ескерсек, ұлттық құрамаға аса реніш жоқ.
57 келі салмақта күш сынасқан Мейрамбек Қартбайдың бұл – құрлықаралық турнирдегі алғашқы медалі. Ақтөбе күрес мектебінің түлегі өзбекстандық балуанды жеңіп, жартылай финалда жапониялық спортшыдан айласын асыра алмаған еді. Кіші финалда қытайлық балуанмен бозкілемде белдесіп, қола жүлдені еншіледі.
Ал 61 келіде күміс жүлде иеленген Асыл Айтақын финалда қырғызстандық спортшы Тайырбек Жумабекуулымен белдесті. Тартысты бәсеке 3:1 есебімен аяқталып, Асыл Айтақын екінші орынды қанағат етті. Келесі күмісті Белградта өткен әлем чемпионатында алтын алып, тәуелсіз Қазақстаннан шыққан алғашқы және әзірге жалғыз әлем чемпионы атанған Ризабек Айтмұхан қанжығалады. Финалдағы қарсыласы – Бахрейннің намысын қорғап жүрген дағыстандық Ахмед Тажудинов. Әлем чемпионатында олимпиаданың қос чемпионы ресейлік Абдулрашид Садулаев пен американдық Кайл Снайдерден басым түскені күрессүйер қауымға белгілі. Еркін күрестің 97 келі салмағының потенциалы жоғары саналатын екі жас балуанның жекпе-жегінде Тажудинов басымырақ болды. Есеп – 4:2.
Алтын медаль иеленген Азамат Дәулетбековтың 3 жыл қатарынан бағы жанып келеді. 86 келі салмақта Азияның үздік балуаны саналатын отандасымыздан Париждегі олимпиадада күтер үміт көп. Ол аталған турнирдің финалында өзбек спортшысы Жабраил Шапиевпен белдесіп, 5:2 есебімен жеңіске жетті. Чемпионның жеңісі жөнінде ұлттық құраманың бас бапкері Қарысбек Махамбетов былай деді.
– 86 келіде Азамат Дәулетбеков қатарынан үшінші рет Азия чемпионы атанды. Шыны керек, Азамат әлемдік деңгейде өнер көрсетті. Өзінің әккі қарсыласы, Өзбекстан атынан күресетін дағыстандық Жабраил Шапиевтен есе қайтарды. Соңғы екі жарыста Шапиев Азаматтан айласын асырған еді. Одан бөлек, Дәулетбеков Иран балуанының да кілтін тапты. Азия чемпионаты Азамат үшін Олимпиадаға дайындықтың бір бөлшегі болады, – дейді бапкер.
Еліміздегі күрес спортының әл-ауқаты жақсы, жасөспірімдерді дайындайтын орталықтар мен мектептер де жоқ емес. Тіпті қанымызға біткен спорт түрі саналатын бокспен бірдей көңіл бөлініп, жаттықтырылады. Десе де, жалпы генетикамыз бен менталитетіміз дағыстандықтар мен кавказдықтарға ұқсас болғанымен, олармен еркін, грек-рим күресі бойынша текетіресе алмай жүрміз. Бірақ, аталған спорт бұрынғыға қарағанда сәл қарқын алғандай. Бұған былтыр Астанада өткен Азия чемпионатында, Белградтағы Әлем чемпионатында куә болдық. Балуандық өнер бізге таңсық емес. Сол себепті алдағы Парижде өтетін олмпиадада отандық спортшыларымыздан мол үміт күтеміз.
Айтілес ЖАЙШЫЛЫҚ
Пікірлер жоқ. Бірінші болыңыз!