Бүгін Қызылорда қаласында мемлекет және қоғам қайраткері, Социалистік Еңбек Ері Исатай Әбдікәрімовтің 100 жылдығына арналған іс-шаралар өтуде. Еске алу іс-шаралары облыс әкімдігіндегі «Исатай Әбдікәрімов: Азамат. Тұлға. Қайраткер» атты ғылыми-танымдық конференциядан басталды.
Ұлт қайраткерін ұлықтауға арналған конференцияға құрметті қонақ ретінде ҚР Ұлттық Ғылым академиясының академигі Мұрат Жұрынов, ҚР Инженерлік академиясының академигі Тұрлыбек Искаков, боксшы, КСРО еңбек сіңірген спорт шебері Серік Қонақбаев, ҚР Ұлттық Қауіпсіздік комитетінің генерал-лейтенанты Олег Бижанов, еліміздегі қаржы институтының дамуына үлес қосқан қайраткер Ерлан Татишев, мемлекет және қоғам қайраткерлері, зиялы қауым өкілдері, Исатай Әбдікәрімұлының ұрпақтары, туған-туыстары мен үзеңгілес інілері қатысты.
Облыс әкімі Нұрлыбек Нәлібаев аймақтың 85 жыл мерейтойын атап өтуде ғылыми-танымдық, мәдени-көпшілік шараларға негізгі басымдық берілгенін айтты. Оның ішінде, облыстың дамуында өзіндік қолтаңбасы бар азаматтар есімін ұлықтауға арналған тағылымды шаралардың орны ерекше.
«Исатай ағамыз Қызылорда облысын басқарған тұста елге сіңірген еңбегі үшін жұртшылықтың ерекше сүйіспеншілігіне ие болды. Қызылорда облысы Кеңес Одағы бойынша күріштің 25 пайызын өндіріп, ырысты, күрішті Сыр еліне айналды. Исатай Әбдікәрімұлының тұсында шаруашылық басшылары, күрішшілер, малшылар, механизаторлар, жалпы саны 6 адам Социалистік Еңбек Ері атағын алды. Ағамыз Қазақ ССР Жоғарғы Кеңесі Президумының Төрағасы қызметінде де абыройлы болды. Қай қызметте жүрсе де қайраткерлік қабілетін көрсетті.
Облысымыздың шежіресіндегі даму үрдістері бүгін де жалғасуда. Күні кеше Мемлекет басшысы Қасым-Жомарт Кемелұлы Тоқаев арнайы жұмыс сапарымен келіп, өңірдің әлеуметтік-экономикалық дамуымен танысты. Зиялы қауым қатысқан конференцияны пайдаланып, Президентіміздің өңір халқына деген ыстық ықыласын, бірлесіп атқарған жұмысымызға берген жоғары бағасын өздеріңізге жеткізгім келеді. Бұл баға – елдің бірлігі мен тату тірлігінің нәтижесі және ағаларымыз салып берген сара жолдың сабақтастығы деп білемін», – деді аймақ басшысы.
Жиында ҚР Парламенті Сенатының Төрағасы Мәулен Әшімбаев пен ҚР Парламенті Мәжілісінің Төрағасы Ерлан Қошановтың, Өзбекстан Республикасының мемлекеттік және саяси қайраткері Мұрат Камаловтың арнайы құттықтау хаттары оқылды.
Конференцияда академиктер Мұрат Жұрынов, Тұрлыбек Искаков, облыстық мәслихат төрағасы Наурызбай Байқадамов, Қорқыт Ата атындағы Қызылорда университетінің проректоры Жандос Базартай, қоғам қайраткері Ибрагим Әбибуллаев баяндама жасады.
Іс-шара соңында Исатай Әбдікәрімовтің қолжазбаларынан жинақталған жаңа кітаптың тұсаукесері ұйымдастырылды.
Айта кетейік, қайраткердің ғасырлық тойын атап өту аясында И.Әбдікәрімов атындағы Қызылорда аграрлық-техникалық жоғары колледжіндегі ескерткішке гүл шоқтарын қою рәсімі өтті. Мұнан әрі арнайы ас беріледі.
Пікірлер жоқ. Бірінші болыңыз!