Halyqline.kz – үздіктер қатарында!

Саябаққа спорттық нысандар салыну қажет

02.08.2021, 9:20 323

HALYQLINE.KZ  Аудан орталығындағы көрікті орындардың бірі – «Жеңіс» саябағы деп айтсақ қателеспейміз. Жайқалған жасыл желектің айналасында тұрғындар отбасымен бірге келіп, балаларымен бірге серуендейді.

Кеше аудан әкімі Мұхтар Оразбаев бірқатар сала басшыларымен бірге саябақты аралап көрді.

Саябақ қазіргі таңда аудандық мәдениет және тілдерді дамыту бөлімінің теңгерімінде. Бұл туралы бөлім басшысы Болат Жолтаев айтып берді.

– 1985 жылы салынған саябақта жерлесіміз, жезтаңдай әнші, Халық Қаһарманы Роза Бағланова мен Кеңес Одағының батырлары, мемлекет және қоғам қайраткерлері, Социалистік еңбек ерлерінің бюсттері орналасқан. Сонымен қатар, Ұлы Отан соғысына қатысқан қазалылықтардың есімі жазылған орын мен «Мәңгілік алау», теміржолшылар мен тәртіп сақшыларына арналған арнайы алаң, балалар доп тебетін жасанды төсеніш те бар, – деді бөлім басшысы.

Саябақ ішіне теміржолшылардың қолдауымен шырша ағаштары да жайқалып өсіп тұр. Бұл талдарға жаңбырлатып суару арқылы су беріледі.

Аудан басшысы саябақта жайқалып өскен ағаштардың қураған бұтақтарын кесіп, балақтау жұмыстарын жүргізуді тапсырды. Сонымен қатар, бос жатқан жерге халыққа қажетті нысандар, балалардың бос уақытын өткізетін спорттық алаңдар салу қажеттігін айтты.

Аудандық құрылыс, сәулет және қала құрылысы бөлімі басшының міндетін атқарушы Еділғали Әлішев саябақ ішіндегі бос жерге спорт кешені мен теннис кортын салу үшін жоба дайындауға қаржы сұралып жатқанын жеткізді. Бюджеттен қаржы бөлінсе, қос нысанның жоба-сметалық құжаттары дайындалады.

Аудан әкімі Мұхтар Оразбаев бұл жерге одан бөлек, бассейн, хоккей алаңы, коньки тебетін орындар да дайындалу қажеттігін айтты. Сонымен қатар, саябақтың ішіндегі бұрыннан бар жүгіру жолын дұрыстауға тапсырма берді.

Айта кетейік, «Жеңіс» саябағы аудан тұрғындары бос уақыттарында демалатын, серуендеп бой жазатын, Отан үшін от кешіп жанын пида еткен бабалардың ерлігін мәңгі еске қалдыру мақсатында салынған.

Пікірлер жоқ. Бірінші болыңыз!

Пікір жазыңыз

Тағы да оқыңыз: