Президент Қасым-Жомарт Тоқаев Қаржы нарығын реттеу және дамыту агенттігінің төрағасы Мәдина Әбілқасымованы қабылдады. Кездесуде қаржы нарығының биылғы сегіз айдағы нәтижелері мен алдағы міндеттер талқыланды.
Агенттік төрағасының мәліметінше, банктер туралы жаңа заңды іске асыру аясында заңға тәуелді актілер базасы толық жаңартылып, 80 нормативтік-құқықтық акт қабылданған.
Қазақстан банктерінің активтері 6,9 пайызға өсіп, 75,6 трлн теңгеге жетті. Капиталдың жеткіліктілік деңгейі 20,7 пайызды құрады.
Сегіз айда қаржы секторы субъектілеріне 279 инспекторлық тексеру жүргізіліп, 190 қадағалау шарасы қолданылған. Нәтижесінде жалпы сомасы 465 млн теңге айыппұл салынды.
Микроқаржыландыру және коллекторлық агенттіктер нарығында да бақылау күшейген. 13 субъект лицензиясынан айырылып, алтауының лицензиясы уақытша тоқтатылған. Тағы төрт коллекторлық агенттік тізілімнен шығарылды.
Кездесуде халықтың шамадан тыс несие алуын азайту мәселесі де сөз болды. Реттеу шараларының нәтижесінде жеті айда тұтынушылық несиелердің өсімі 4,6 пайызға дейін баяулаған.
Сонымен қатар бизнеске берілген кредиттер 3,5 пайызға өсіп, 16 трлн теңгеге жетті. Жыл басынан бері кәсіпкерлікке жаңадан берілген несие көлемі 19,1 пайызға көбейіп, 12,5 трлн теңгені құрады.
Шілде айынан бастап мерзімі өткен берешекті ұжымдық реттеуге арналған Finkelisim.kz платформасы іске қосылған. Ал жыл соңына дейін азаматтардың арыз-шағымдарын қарайтын Бірыңғай қаржы омбудсмені кеңсесін ашу жоспарланып отыр.
Мәдина Әбілқасымова Мемлекет басшысына капитал және сақтандыру нарықтарын 2030 жылға дейін дамыту бағдарламасының, сондай-ақ осы салаларға қатысты жаңа заң жобаларының әзірлену барысын да таныстырды.
Қаржы секторын цифрландыру бағытында агенттік жасанды интеллект негізіндегі FinAI бірыңғай қадағалау платформасын құрған. Жыл соңына дейін қаржы нарығына жасанды интеллектіні енгізу стратегиясы әзірленеді. Онда ақпараттық қауіпсіздік пен деректерді қорғаудың бірыңғай талаптары қарастырылмақ. Кездесу қорытындысында Президент қаржылық тұрақтылықты қамтамасыз ету, экономиканың нақты секторларын кредиттеуді ұлғайту, капитал мен сақтандыру нарығын одан әрі дамыту, сондай-ақ қаржы саласында жасанды интеллектіні кеңінен енгізу жөнінде бірқатар тапсырма берді.
Сонымен бірге Мемлекет басшысы жаңа технологияларды енгізу кезінде ақпараттық қауіпсіздік пен азаматтардың дербес деректерін қорғауға ерекше назар аударуды тапсырды. Агенттік жыл соңына дейін қаржы нарығына жасанды интеллектіні енгізудің арнайы стратегиясын әзірлемек.
Осылайша, алдағы кезеңде қаржы нарығын реттеуде қадағалауды күшейту, халықтың шамадан тыс кредит алуын тежеу, бизнесті қаржыландыруды кеңейту және қаржы секторын цифрландыру негізгі бағыттардың бірі болмақ.
Пікірлер жоқ. Бірінші болыңыз!