«Отау» бағдарламасы іске қосылады

Баспаналы болуға тағы бір мүмкіндік туды. Елімізде баспанасы жоқ жастар мен отбасылар  үшін  1  наурыз­дан бастап, «Отау» бағдарламасы іске қосыла­ды. Бұған дейін «9-20-25» атауы­мен көпшілікке танылған бағдар­ламаға өзгеріс енгізіліп, енді жаңа атаумен тұрғындарды үймен қамтамасыз етуде пайдалы болмақ. Бағдарламаға қатысып, баспаналы болуға асыққандар 1 наурыз бен 30 сәуір аралығында otbasybank.kz порталында өтініш жолдай алады. Егер бағдарламаның берекесін көремін деп ниет­тенсеңіз, мына талаптарға сай болуы­ңыз  керек.

• Үміткердің  жинақ  шоты  ең  кемі  18  айлық  болуы  керек.

• Өтінім беру сәтінде депозиттегі жинақ сомасы 1 млн теңгеден кем бол­мауға тиіс.

• Бағдарламаға қатысушыда және оның отбасы мүшелерінде кейінгі 5 жыл ішінде жылжымайтын мүліктің бол­ған-болмағаны қатаң тексеріледі.

• Алматы және Астана қалаларынан тұрғын үй алатын жағдайда сол қалаларда тұрақты тіркеуі болуы қажет.

• Жобаға 18-63 жас аралығындағы  кез келген азамат қатыса алады, дегенмен 35 жасқа дейінгі жұмыс істейтін жастарға  басымдық  беріледі.

«Отбасы банк» АҚ басқарма төрағасы Ләззат Ибрагимова бұл бағдарлама арқылы алдағы 7 жылда 50 мың отбасы­ны баспанамен қуанту жоспарда бар екенін  жеткізді.

– Жыл сайын біз қаржыландыруға 150 млрд теңге бағыттаймыз. Бұл ақша «Отбасы банктің» өз қаражаты есебінен бөлінеді, сондай-ақ Қазақстан қаржы нарығынан да қарыз алып, қаражат тартуды жоспарлап отырмыз. «Отау» бағдарламасы 7 жылға есептелген. Осы кезеңде біз 50 мың азаматтың тұрғын үй мәселесін шешуге  көмектесеміз, – деді  ол.

Айта кету керек, otbasybank.kz пор­талында өтініш қалдырған азаматтардың үй алуына төмендегідей міндеттер бойын­ша ұпай беріледі.

Ең жоғары ұпай жинағыңыз келсе, мына мәтіметтерге көңіл  бөліңіз.

• Салым бойынша сыйақы мөлшері үшін – әрбір 1 000 теңгеге 5 балл.

• Салым  мерзімі  үшін –  салымның  әрбір  жылы  үшін  5  балл.

• Тіркелген неке үшін – 10 балл.

• Балалардың болуы үшін – санына қарамас­тан  50  балл.

Берілетін несие көлемі қандай және қандай  тұрғын  үй  сатып  алуға  болады?

• Алматы мен Астанадағы заемның ең жоғары сомасы – 30 млн теңгеге дейін.

• Қалған өңірлерде – 18 млн теңгеге дейін.

• Тек алғашқы нарықтағы тұрғын үй – Алматы, Астана, Шымкент қалаларында және облыс орталықтарында (оның ішінде ҚТК кепілдігімен үлестік қатысу шарты бойынша).

• Басқа елді мекендерде кез келген тұрғын үй.

«Отау» бағдарламасының негізгі  шарттары:

• Алғашқы жарна – 20%-дан  басталады.

• Несие бойынша мөлшерлеме – жылдық 9% (ЖТСМ 9,2%-дан басталады).

• Несие мерзімі – 19 жылға дейін.

Ескеретін бір жайт бар, егер үміткерлердің ұпай саны бірдей болып қалса, онда басымдық салым сомасы көбірек және жинақтау мерзімі ұзағырақ адамдарға беріледі. Іріктеуден өткен қатысушылар 40 жұмыс күні ішінде несиелік өтінім бере алады. Банктен оң мақұлдау алған жағдайда несиелік өтінім 6 ай ішінде жарамды. Осы уақыт аралығында бағдарламаға қатысушы баспана тауып, несие алып, тұрғын үйді сатып алуы тиіс.

Халық-хабар

Сурет ашық дереккөзден алынды.

Инфографиканы жасаған Е.Қалиев