Halyqline.kz – үздіктер қатарында!

Біржан халыққа сенді, халық кімге сенеді?

17.04.2020, 1:20 486 0

HALYQLINE.KZ –| Шыны керек, халықтың көбі төтенше жағдайға байланысты берілетін 42500 теңге әлеуметтік төлемге өтініш берді. Табысына қарамастан осы ақшаны алған азаматтардың заң алдында жауап беретіні, тіпті 1000 АЕК көлемінде айыппұл төлейтіні немесе 2 жылға сотталуы мүмкін деген жазба тарады. Содан не керек, халық үкіметтің жарылқап бергенін кері қайтарудың жолын қарастырып, банктің есігін күзетті.

Еңбек және халықты әлеуметтік қорғау министрі Б.Нұрымбетов жауап берді. Сіздің де басыңызда осы жайт кездессе, оқи отырыңыз. Сөзбе-сөз.

  • 42500 мың теңге алған үшін соттайды екен туралы. Біраз заңгерлер алаяқтық үшін қылмыстық жауапкершілік бар екені туралы мақала, не посттар жазуда. Оны 42500 теңгеге қатыстырып келтіруде. Заңгер болған соң заңды бізден артық біледі ғой. Олардікі дұрыс та шығар, бірақ бұл тек алаяқтарға қатысты. Сіз ондай емессіз ғой. Сіз ешкімді алдаған жоқсыз. Мен брифингтерімде, жазбаларымда айтқандай, өздеріңіз үшін – “мен жұмыс, тіршілік жасап (ресми, бейресми), ақша тауып жүр едім, енді төтенше жағдайға қатысты сол табыстан айырылдым” деп шештіңіздер ма? Кейін, мен ескерткендей, өтініш бергенде порталда төмендегі жазбаны тағы да оқып, растап, сөйтіп барып, өтінішті жібердіңіз бе? Ондай болса, Сіз айттыңыз, біз сендік. Сіз алдаған жоқсыз. Біз тағайындадық, төледік. Сол үшін кінәлайды деп еш уайымдамаңыздар. Дәл мен айтқандай жасаған болсаңыздар, біздің тарапымыздан үйді аралап ешкім тексермейді. Бұл қайдан шыққан әңгіме дейсіздер ғой. Соңғы брифингте бір жүрналист маған: мен жұмыс істеп, тұрақты жалақы алып жүрген адам 42500 теңге алғанын білемін, оны қалай өткізіп алдыңыз, – деп сұрады. Мен оған, біз өтініш беру тәртібін, халықтың сұрауы, талабы бойынша барынша қарапайымдаттық, жұмыс беруші өтінішінде қызметкерлерімді ақысыз демалысқа жібердім деп көрсетті, біз оған сендік. Ал олай болмаса, жұмыс беруші жауап береді, оны біз кейін тексеріп аламыз деп жауап қайтардым. Брифингті көргендер растайтын шығар. Жалпы дұрыс емес пе? Артынша екінші сұраққа, өтініш берген халықты, үйлерін аралап тексермейміз дедім. “Сіз айттыңыз, біз сендік. 42500 теңге алдыңыз ба, жаратыңыз” дедім. Солай болады. Сондықтан, осы жағдайда, өзіңіз үшін тағыда шешіп алыңыз – мен 42500 теңгені алдап алдым ба, жоқ па деп. Әрине жоқ. Олай болса, Сіз ешқандай жауапкершілікке ешқашан тартылмайсыз. Халық 42500-ге өтініштерін еріккеннен беріп отырған жоқ. Төтенше жағдай болмаса да басым халықтың табысы аз. Жалақы төмен, зейнетақы, жәрдемақы көп емес. Сондықтан, біз қарапайым таза халықты артынша тексеріп жатпаймыз. Аман болыңыздар, өзіңізді, жақындарыңызды мына індеттен сақтаңыздар! – деді еңбекмині әлеуметтік желідегі парақшасында.

Осы жазбадан кейін 1000 айлық есептік көрсеткіш көлемінде айыппұл төлеуден, қылмыстық жауапкершілікке тартылудан қорыққан халықтың үрейі сейіле бастады. Дегенмен, жалақысы сақталатын демалыста отырғандар, қашықтан жұмыс істеуге көшкен мекеме қызметкерлері, табысынан айрылу туралы заңды дәлелі жоқ тұлғалар тағайындалған 42500 теңге төлемді кері қайтарудың қамын жасап жүр. Өйткені кімге сенерін білмейді. Заңдық тұрғыдан талдап, таразылап көрсеткен заңгерлер ме, әлде «халықты артынша тексеріп жатпаймыз» деген министрге ме? Бір түсінгеніміз, Нұрымбетов халыққа сеніп отыр, ал халық кімге сенеді?

Пікірлер жоқ. Бірінші болыңыз!

Пікір жазыңыз

Тағы да оқыңыз: