Обалына не керек, Жаңақорған ауданына 361 күн әкім болған Сұлтан Мақашов сөзден гөрі іске бейім жігіт екен. Әсіресе құрылыс жұмыстарына жетік секілді. Ауылдардағы әлеуметтік нысандарды және де жолдардың жөнделуіне баса назар аударып, біразын жүзеге асырды. Бір шеттегі Көктөбе ауылына тірелетін жолдың жұмысы ұзаққа созылса да, қазір жұртшылықтың әжетіне жарап тұр. Тек, Келінтөбенің бергі жағы мен Қаратөбенің арасындағы 7-8 шақырымның аяқталмай қалғаны болмаса.
Шерхан Мұртаза айтпақшы «Бір кем дүние» дегендей, бітпей қалған тағы бір құрылыс бар. Ол – Әбдіғаппар ауылына кіреберіс маңдағы көпір. Осы көпір арқылы Әбдіғаппар, Машбек, Қыркеңсе, Өзгент, Қожакент, Түгіскен, Келінтөбе, Қаратөбе, Қандөз, Көктөбе, Қашқанкөл, Қалғансыр ауылдарына аудан орталығы жағынан баратын көліктер өтіп келген-ді. Түгіскеннен асқан соң Бесарық арқылы Түркістанға да жол осыдан шығады. Нақты уақытта жолаушылар бұзылған көпірді айналып өтетін бір шақырым шамасындағы шаңы шыққан шоқалақ жолмен қатынауға мәжбүр. Ал биылғы жылғы мамыр айының соңына қарай жөнделуге жабылған көпір құрылысының мына түрімен қашан бітері жұртшылыққа белгісіз.
Еске сала өтсек, расында аталмыш көпір 2015 жылы қауіпті деп жабылған болатын. (Бұл туралы аудандық газетте фото айыптау жарияланғанын оқырмандар біледі). Кейін жұрт шулаған соң, көпірдің бір ернеуін ашып, тек жеңіл көліктер өтетіндей амалдастырған-ды. Қазіргі халі мына суреттегідей. Өз қамынан бұрын елдің жағдайын ойлайтын басшы болса, бұл жұмысқа қозғау салуы тиіс. Әлде көпірдің жөнделуі «баяғы жартас – бір жартастың» кебін кешіп тұра берер ме екен?!
Нұрмахан ЕЛТАЙ,
журналист
Пікірлер жоқ. Бірінші болыңыз!