Әлемдік мұнай бағасы 25 мамырда екі апталық ең төменгі деңгейге дейін арзандады. Reuters хабарлауынша, баға АҚШ пен Иран арасындағы ықтимал бейбіт келісімге қатысты үміт күшейгеннен кейін төмендеген. Brent маркалы мұнай 5,85 долларға арзандап, барреліне 97,69 доллар болды. WTI бағасы 5,75 долларға түсіп, барреліне 90,85 доллар деңгейіне жетті.
АҚШ президенті Дональд Трамп бұған дейін Вашингтон мен Тегеран бейбіт келісім бойынша негізгі түсіністікке жақындағанын мәлімдеген. Келісім Ормуз бұғазын қайта ашуға қатысты болуы мүмкін. Бұл бұғаз қақтығысқа дейін әлемдік мұнай мен сұйытылған табиғи газ тасымалының бестен бір бөлігі өтетін маңызды теңіз жолы болған.
Сарапшылар нарықтағы үмітке қарамастан, келісімге қатысты тәуекел әлі де көп екенін айтып отыр. Reuters дерегінше, тараптар бірнеше күрделі мәселе бойынша әлі толық келіспеген, ал Ормуз арқылы мұнай ағынын қалыпқа келтіру бірнеше айға созылуы мүмкін.
Пікірлер жоқ. Бірінші болыңыз!