Айналасы «сын мен мінге» толы қоғамдық көліктің қазіргі көрінісі көңіл көншітпейді. Автобустардың жетіспеуі, жолаушылардың «тығылысып» тұруы сынды мәселелер қоғамдық көліктің айналасында жүргеніне көп болды. Карантин уақытында керісінше, автобустар саны тым азайып, ішінде ине шаншар орын қалмайтынын да көріп жүрміз. Бұл тек автобус паркінің ғана емес, жалпы қаламыздың өзекті мәселесіне айналған. Осы тұрғыда, «Қызылорда автобус паркі» ЖШС-не үлкен сыйымдылықты 13 автобус табысталды. Жаңа автобустардың сапасы мен сыйымдылық жағдайын көзімізбен көріп қайттық.
Автобустарды табыстау рәсімі аймақ басшысы Гүлшара Әбдіқалықова мен қала әкімі Нұрлыбек Нәлібаевтың қатысуымен өтті. Шарада облыс әкімі автобус паркі құрылған санаулы жылда автопарктің техникалық базасын қалыптастыру мақсатында 122 дана жаңа автобус алынғанын айтып, қаламыздың қоғамдық көліктер қатарын толықтырған жаңа автобустар ел игілігіне ұзақ қызмет етуін тіледі. Жаңа автобустар Семей қаласындағы «СЕМАЗ» ЖШС-да құрастырылған. Яғни, отандық өнім. Қоғамдық мәселеге айналған қоғамдық көліктің санын көбейту һәм халықтың сұранысын қанағаттандыру үшін облыстық бюджеттен 209 млн теңге және автобус паркінің өз қаражаты есебінен 242 млн теңге бөлінген.
– «Қызылорда» автобус паркі» құрылғаннан бастап, автопарктің техникалық базасын қалыптастыру мақсатында 122 дана жаңа автобус алынған болатын. Енді Сырдың бас шаһарында Семей қаласының «СЕМАЗ» зауытында құрастырылған үлкен сыйымдылықты жаңа автобустар жолаушыларды тасымалдайтын болады. Жаңа автобус заманауи үлгіде жасалған. Бүгінде қала ішінде 25 бағыт және қала маңына қатынайтын 8 бағытта 636 автокөлік қызмет етеді. Биылғы жылдан бастап «Цифрлық Қазақстан» жобасымен қалада бірқатар қоғамдық көліктерге электронды билет жүйесі енгізілді. Бүгінге дейін 212 мың адам терминал арқылы, 15 мың адам телефон арқылы жолақысын төлеген. Бұл жолаушыларға қолайлы жағдай жасауға ықпал етуде деп ойлаймыз. Қазіргі таңда облыс экономикасының даму қарқыны ұлғайып, халықтың әлеуеті артып келеді. Әсіресе, облыс орталығы Қызылорда қаласында істеліп жатқан игі істердің қатары мол. Биылдың өзінде «Жұмыспен қамту–2020» жол картасымен көптеген жұмыстар атқарылды. Осы бағытта ары қарай да жұмыс істейтін боламыз. Автобустардың тозатынын ескере отырып, жаңа автобустар санын көбейтуді де жоспарлап отырмыз, – деді облыс әкімі Гүлшара Әбдіқалықова.
Соңғы үлгідегі автобустар 55 адамды тасымалдауға жетеді. Сонымен қатар, экологиялық таза метан газымен жүреді. Жолаушылардың мініп-түсуі толығымен бейнебақылауға түсіріледі. Бұл халық қауіпсіздігі үшін өте маңызды. Ең бастысы, мүмкіндігі шектеулі азаматтарға қолайлы етіп жасалған. Жаңадан келген автобустардың басым бөлігі №1 бағытқа жіберіліп, қала тұрғындары мен қонақтарына қызмет ететін болады. Шара барысында автобус кілті жүргізушілерге салтанатты түрде табысталды. Кілтті табыстау құрметі облыс әкімі Гүлшара Наушақызына бұйырды.
– Өздеріңіз білетіндей, 2013 жылдан бері Қызылорда қаласында жаңадан автобус паркі құрылған болатын. Соның құрамында 122 автобус бар еді. Автобус паркінің базасын жаңалау мақсатында облыс бюджетінен қажетті қаржы бөлініп, 13 автобус алынды. Алдағы уақытта олардың санын ұлғайтуды жоспарлаудамыз. Қазірдің өзінде 80 жаңа автобусқа сұраныс бердік. Бүгінде автобус паркі қаланың 6 бағытын ғана қамтуда. Қалған бағыттар жеке тасымалдаушылардан тұрады. Дәлірек айтсақ, 250 көлік жеке тасымалдаушылардан тұрса, автобус паркінен 65 көлік шығарылып отыр. Бұл – карантин уақытындағы сандар. Қалыпты жағдайда жеке тасымалдаушылардан 350, автобус паркінен 85 көлік шығатын болады,– деді «Қызылорда» автобус паркі» ЖШС директоры Нұржан Ахатов.
Карантиннің болжамды екінші толқынының алдында осындай халық көп шоғырланатын орындардың бірі қоғамдық көліктің саны ұлғайып жатқаны – көрікті көрініс. Поляктың бір жақсысы «Біздің автобусқа сабынсыз тек жүргізуші ғана сыйып кетеді» деген екен. Бізде де жағдай осындай емес пе? Кешкілік уақытта жолаушылар санының көптігінен автобус есігі жабылмай жатқанына да куә болып жүрміз. Жаңа автобустардың келуімен бұл мәселелер аз да болса өз шешімін табады деп сенеміз.
Бекзат АМАНОВ,
Н.Нұржаубай (сурет)
Пікірлер жоқ. Бірінші болыңыз!