Halyqline.kz – үздіктер қатарында!

Барлық жолдың сапасына Үкімет жауап беруі тиіс – Президент

28.10.2026, 11:47 141

Қазақстанда республикалық және жергілікті маңызы бар автомобиль жолдарының сапасына жауапкершілік күшейтіледі. Президент Қасым-Жомарт Тоқаев Үкіметке барлық жолдың мәселесімен Көлік министрлігі арқылы айналысуды тапсырды, деп хабарлайды Halyqline.kz.

Мемлекет басшысы 28 қазандағы Қазақстан халқына Жолдауында жол инфрақұрылымының сапасын сынға алды. Оның айтуынша, ел аумағы арқылы өтетін жүк көлемі жыл сайын артып келеді. Алайда автомобиль жолдарының жағдайы Қазақстанның халықаралық транзиттік әлеуетіне толық сәйкес келмейді.

Президент әсіресе солтүстік өңірлердегі жол инфрақұрылымына назар аударды. Осыған байланысты «Көкшетау – Петропавл» тас жолын кеңейту жұмыстарын бастауды тапсырды.

— Біз Қазақстанның барлық аймағын байланыстыратын, яғни еліміздің транзиттік әлеуетін күшейтетін заманауи, өте дамыған теміржол және көлік жолдарының тұтас желісін құруымыз керек. Бұл – стратегиялық міндет. Еліміз арқылы тасымалданатын жүк көлемі жыл сайын ұлғайып келеді. Демек, біздің алдымызда жол инфрақұрылымын жақсарта түсу міндеті әлі де тұр. Бұл, әсіресе, солтүстік аймақтарға қатысты өзекті мәселе. Сондықтан ендігі кезекте «Көкшетау – Петропавл» тас жолын кеңейту ісіне кірісу керек, – деді Қасым-Жомарт Тоқаев.

Мемлекет басшысы елдегі автокөлік транзитінің жартысынан астамы шетелдік тасымалдаушылардың үлесіне тиетінін де айтты. Ол отандық жүк тасымалдаушы кәсіпкерлерді қолдау үшін Үкімет нақты шаралар қабылдауы керектігін жеткізді.

Президенттің тағы бір тапсырмасы шекарадағы автомобиль өткізу бекеттеріне қатысты болды. Оның айтуынша, барлық бекетті сапалы қайта жаңғырту жұмыстары 2027 жылы аяқталуға тиіс.

Сонымен қатар Тоқаев жолдың сапасына қатысты жауапкершілікті орталық және жергілікті атқарушы органдардың бір-біріне ысыра беруін сынға алды.

— Бізде республикалық және жергілікті жолдардың барлығын сапалы салу мәселесі өте өткір тұр. Орталықтағы және жергілікті атқарушы органдар түрлі ережелер мен регламенттерді сылтауратып, мәселені бір-біріне ысырып келді. Ақырында маңызды проблема шешілместен қалды. Сондықтан тапсырма беремін: барлық жолмен, мейлі республикалық болсын, олардың үлесі шамамен 26 пайыз, мейлі әкімдіктердің қарамағындағы жергілікті жолдар болсын, Үкімет Көлік министрлігі арқылы айналысуға тиіс. Қайталап айтамын, бізге өте сапалы жолдар қажет. Битум мен қиыршық тастың сапасын сылтау ету қабылданбайды, – деді Мемлекет басшысы.

Президенттің сөзінше, жолдардың жағдайы транзиттік тасымалдың жылдамдығына да, отандық кәсіпкерлердің табысына да тікелей әсер етеді. Ол Қазақстанның Еуразиядағы көлік-логистикалық орталыққа айналуы үшін тек жол салумен шектелмей, жол бойындағы қызмет көрсету инфрақұрылымын да дамыту қажеттігін айтты.

Мемлекет басшысы шекара бекеттеріндегі ұзын-сонар көлік кептелістеріне де тоқталды. Оның бағалауынша, шекарадан өту рәсімдері халықаралық жүк тасымалының дамуына кедергі келтірмеуге тиіс.

Осылайша, Үкіметке жол сапасын бақылауды күшейту, шекарадағы өткізу бекеттерін жаңғырту, солтүстік бағыттағы жолдарды кеңейту және отандық жүк тасымалдаушыларды қолдау міндеттері жүктелді.

Пікірлер жоқ. Бірінші болыңыз!

Пікір жазыңыз

Тағы да оқыңыз: