Дос КӨШІМ,
Қазақстанның еңбек сіңірген қайраткері:
— Бұлардың бір-бірінен ешқандай айырмашылығы жоқ. Екеуін де бір сөзбен Парламент деп атауға болады. Бұрынғы Қазақстан Парламенті екі палатадан тұрса, қазіргі Парламент («Құрылтай» деп аталатын) бір палатадан тұрады. Айырмашылығы – осы ғана. Көптеген федеративті құрылымдағы елдердің Парламенті екі палатадан тұрады. Бірінші палатаны сол елдің барлық азаматы сайласа, екіншісін (көп жерде «Сенат» деп аталады) федерация құратын субъектілердің (штаттар, автономиялық құрылымдар, жеке аймақтар, т.т.) өкілдері құрайды. Біздің бұрынғы Сенатымыз облыстардың өкілдерінен құралды. Әр облыстан екі адам Сенат депутаты болды. Оларды сол облыстың мәслихаттары сайлады. (Шын мәнісінде, «сайлады» деп айту ыңғайсыз болар, «тағайындады»).
Тоқсаныншы жылдары Сенат сияқты құрылым Президент үшін қажет болды. Ол өзіне жақпаған, бірақ Мәжіліс өткізген заң жобаларын Сенат арқылы өзгертіп не тоқтатып отыруға мүмкіндік алды. Ол уақытта, тәуелсіздіктің алғашқы кезеңінде Мәжіліс біршама батыл болатын. Кейде Президенттің бастамаларына да қарсы шығатын.
Қазір бәрі өзгерді. Парламент Президенттің айтқанынан шықпайды. Сондықтан Сенаттың да қажеті жоқ болып шықты. Сенат таратылды, бірақ сол адамдар сол күйінше сол орындарында қалатыны анық. Құрылтайдың құрамы, керек десеңіз саны да ешнәрсенің өзгермегенін көрсетеді. Қосылғыштардың орны ауысты, алайда…
Жазып алған
Н.АҚПАН
Фото: ашық дереккөзден
Пікірлер жоқ. Бірінші болыңыз!