Президент Қасым-Жомарт Тоқаев Қазақстан халқына Жолдауында елдің болашақ дамуына қатысты стратегиялық міндеттерді атады. Мемлекет басшысы келер ұрпаққа экономикасы қуатты, жоғары технологиялары дамыған, білім мен ғылымға негізделген Қазақстан қалдыру қажеттігін айтты, деп хабарлайды Halyqline.kz.
28 қазанда Қазақстан халқына жыл сайынғы Жолдауын жариялаған Президент ел тәуелсіздігінің 35 жылдығына тоқталып, мемлекеттілікті нығайту және қоғамдағы тұрақтылықты сақтау мәселелеріне назар аударды. Оның айтуынша, биыл қабылданған жаңа Конституция елдің саяси жүйесін жаңғыртуға және жаңа билік институттарын қалыптастыруға жол ашты.
Мемлекет басшысы қазіргі халықаралық жағдайдың күрделене түскенін атап өтті. Ол әлемдегі ықпалды мемлекеттер арасындағы өзара сенім дағдарысы, халықаралық құқықтың әлсіреуі және қауіпсіздікке төнген қатерлер Қазақстанның ішкі бірлігі мен мемлекеттік институттарының беріктігін бұрынғыдан да маңызды етіп отырғанын жеткізді.
— Қазіргі таңда әлем елдері арасында ақылға қонымсыз жалған айыптаулар, астыртын текетірестер күшейді, ал алпауыт, ықпалды мемлекеттердің арасында жаппай өзара сенім дағдарысы пайда болды. Бақылаусыз, жүйесіз көші-қон ағындары әлдеқайда көбейді, бұл бірнеше еуропалық елдің қауіпсіздігіне үлкен зиян келтіргеніне көзіміз жетті. Біріккен Ұлттар Ұйымының абырой-беделі үлкен тоқырауға ұшырады. Халықаралық құқықтың құндылығы төмендеп кетті. Қысқасы, қазіргі әлем бұлыңғыр дәуірге аяқ басты, оның келешегі қандай болатыны туралы саясаткерлер мен сарапшылар арасында біртұтас пікір жоқ. Күллі әлем жұртшылығы аласапыран кезеңде өмір сүріп жатыр десек, артық болмас. Мұндай күрделі, болжамсыз ахуал «қырғи-қабақ соғыс» кезінде де болмаған еді, – деді Қасым-Жомарт Тоқаев.
Президент осындай жағдайда Қазақстанның егемендігін нығайтып, ішкі тұрақтылықты сақтай отырып, экономикалық және технологиялық дамуды жалғастыру қажеттігін айтты. Оның пікірінше, мемлекет алдындағы міндеттерді орындау үшін қоғамның бірлігі мен келісімі шешуші мәнге ие.
— Ашығын айтсақ, бүгінде тәуелсіздігіміз бен егемендігімізді қорғауға қатысты барлық мәселе әлі толықтай шешімін тапқан жоқ. Бұл – алдымызда көптеген өзекті міндет тұр деген сөз. Жұмысты ойдағыдай орындау үшін, ең алдымен, бүкіл қоғамымыз тату болуы керек. Бірлік пен келісім болмаса, ешқандай реформа және ілгерілеу болмайтыны айдан анық, – деді Мемлекет басшысы.
Тоқаев Қазақстанның соңғы кезеңде кең ауқымды саяси реформалар жүргізгенін атап өтіп, алдағы уақытта мемлекеттің экономикалық әлеуетін арттыруға, жоғары технологияларды дамытуға және білім мен ғылымға негізделген қоғам қалыптастыруға басымдық беру қажет екенін жеткізді.
— Басқаша айтқанда, қазіргі буын өкілдері, яғни біз келе жатқан жас ұрпақтарға жоспарлар мен тұжырымдар емес, экономикасы қуатты және қарқынды, жоғары технологиялары дамыған, білім мен ғылымға негізделген, заңды мойындайтын, жасампаз әрі озық, геосаяси тұрғыдан күші мен ықпалы бар Қазақстанды қалдыруымыз керек. Бұл – ұлтымыздың алдында тұрған нағыз стратегиялық міндет, – деді Президент.
Мемлекет басшысы осы мақсатқа қол жеткізуде мемлекеттік аппарат пен құқық қорғау органдарының жауапкершілігі жоғары екенін айтты. Сонымен қатар елдің дамуына отаншыл, білімді және белсенді азаматтардың қатысуы маңызды екенін атап өтті.
Президент Жолдауының алдағы бөлігінде Қазақстанның әлеуметтік-экономикалық жағдайын жақсартуға бағытталған міндеттерге тоқталатынын мәлімдеді.
Пікірлер жоқ. Бірінші болыңыз!