Алматыдағы әл-Фараби атындағы Қазақ ұлттық университетінің Өмірбек Жолдасбеков атындағы Студенттер сарайының төбесі опырылып түсті. Ғимараттың ішкі жабындарының бір бөлігі де құлаған.
Оқиғаның нақты себебі әзірге анықталған жоқ. Университеттің баспасөз қызметі ғимарат ұзақ жылдан бері пайдаланылып келе жатқанын және бұған дейін оның техникалық жағдайына байланысты реконструкция жүргізу мәселесі көтерілгенін хабарлады.
ҚазҰУ мәліметінше, Студенттер сарайының құрылысы 1985 жылы басталып, 1998 жылы аяқталған. Нысанның соңғы құрылыс кезеңі шаруашылық тәсілмен жүргізілген. Шамамен 30 жыл бойы ғимаратқа күрделі жөндеу немесе толық реконструкция жасалмаған.
Университет осы уақыт ішінде құрылыс конструкциялары мен инженерлік жүйелердің тозғанын, кейбір элементтердің жағдайы нашарлай бастағанын тіркеген. Сол себепті тіреуіш және қоршау конструкцияларына кешенді техникалық зерттеу жүргізу қажеттігі туындаған.
Баспасөз қызметі 2024 жылғы қаңтарда Алматы мен оған іргелес аумақта бірнеше жер сілкінісі болғанын да еске салды. Университеттің түсіндіруінше, сейсмикалық белсенділік ұзақ уақыт пайдаланылған және зақымдары бар ғимараттарға қосымша әсер етуі мүмкін. Алайда қазіргі опырылудың нақты себебі жер сілкінісі болды деген ресми қорытынды жоқ.
Өмірбек Жолдасбеков атындағы Студенттер сарайы 1620 орынға есептелген. Жалпы аумағы 14 290 шаршы метр болатын кешенде ғылыми конференциялар, концерттер, фестивальдер және университеттің негізгі мерекелік шаралары өткізіліп келген.
ҚазҰУ ғимараттың қауіпсіздігіне қатысты қажетті шаралар қабылданатынын, техникалық зерттеу қорытындысы мен нысанның алдағы тағдыры туралы қосымша ақпарат берілетінін мәлімдеді.
Пікірлер жоқ. Бірінші болыңыз!