9 мамыр – Жеңіс күні. Жаугершілік заман енді-енді бітті, бейбітшілік келді деген тұста ата-бабаларымыз 1939 жылдан бастап, одан бері 1941-1945 жылдар аралығында кенеттен тағы да бір сұм соғысты басынан өткерді. Қазақ халқының қаншама батыр ері де, әйелі де Кеңес одағы әскерінің қатарына қосылып, фашистік Германияға қарсы ел қорғады. Оның жартысына жуығы сол соғыста шейіт болып, енді жартысы ауыр жарақатпен, бірі сау күйі елге қайтқан болатын. Өкініштісі сол, елге оралғандардың көпшілігі қазір ортамызда жоқ. Жалпы, соғысты көзі көргендердің алдының жасы жүзден асты. Еңбек және халықты әлеуметтік қорғау министрлігінің берген мәліметіне сүйенсек, бүгінде Қазақстанда бас-аяғы 176 соғыс ардагері тұрады. Оның төртеуі – Сыр өңірінде.
Ел үшін, жер үшін майданда қан төккен азаматтарымызды әрдайым қадірлеп, барында бағалау – біз үшін міндет. Сондықтан да, уақыт өткен сайын 9 мамыр – Жеңіс күні берілетін сыйақының да көлемі ұлғайып келеді. Жеңіс күніне орай қызылордалық әр соғыс ардагеріне 2,5 млн теңге көлемінде мемлекеттік бюджет тарапынан жәрдемақы берілмек.
Бұл жайында облыс әкімі Нұрлыбек Нәлібаев мамыр айындағы мерекелерді атап өту мәселелері талқыға салынған мәжілісте айтты.
– Ұлы Отан соғысы ардагерлеріне 2,5 млн теңге көлемінде төлем төлеу туралы шешім қабылданды. Бұл – біздің аға ұрпақ алдындағы парызымыз. Бүгінгі бейбіт өмірімізге қан кешіп жүріп жеткізген жандардың ерлігіне қандай құрмет көрсетсек те артық емес. Өткен жылы қарт майдангерлерге 1 үй, 1 көлік, сонымен бірге 1,5 млн теңгеден табысталған еді. Биыл да бір ардагерге Қызылорда қаласынан үй берілді. Бұдан да басқа демеушілер есебінен ақшалай және материалдық көмек көрсетіледі. Қала және аудан әкімдері, облыстық басқарма басшылары мерекені атап өтудің жоспарына енген іс-шараларды сапалы әрі мәнді етіп ұйымдастыруы тиіс, – деді аймақ басшысы.
Қызылордадағы соғыс ардагерлерінің ең үлкені – 102 жаста. Қызылорда қаласы, Сырдария мен Қазалы аудандарының әкімдіктері Жеңіс күніне сәйкес өтелетін төлемді аудару жұмыстарын ұйымдастыру үстінде.
Мереке қарсаңында Нұрлыбек Мәшбекұлы 102 жастағы қарт майдангер Яхия Тасыровты құттықтау үшін арнайы Сырдария ауданына ат басын бұрды. Ұлы Отан соғысы ардагерін құттықтап, сыйлық табыстады. Сырдариялық Яхия Тасыров 1941 жылдың аяқ жағында әскерге аттанып, Ресейдің Сібір, Омбы қалаларында әскери дайындықтан өтіп, 1942 жылы майданға шақырту алған. Соғыс жылдары Сталинградты, Курскіні, Польшаны қорғауға елеулі үлес қосқан. 1945 жылы аяқ жарақатымен елге оралып, аудандағы сүт зауытында әртүрлі қызмет атқарды. «Қызыл жұлдыз» орденімен, «Ұлы Отан соғысы I-II дәрежелі» орденімен, «Ерлігі үшін», «Германияны жеңгені үшін» және т.б. медальдармен марапатталған.
Қазіргі таңда 4 соғыс ардагерінен бөлек Ұлы Отан соғысының ардагерлеріне теңестірілген 3843 азамат тіркелді. Бұл жайында облыстық облыстық жұмыспен қамту және әлеуметтік бағдарламалар басқармасының басшысы Ғабит Жұмабекұлы өңірлік коммуникациялар қызметі ұйымдастырған брифингте айтты.
– Ұлы Отан соғысына Сыр өңірінен 70 мыңнан астам азамат аттанып, олардың көпшілігі сол майданда ерлікпен қаза тапты. Ал, аман-есен елге оралған соғыс ардагерлері өкініштісі сол, жылдан-жылға азаюда. Сондықтан, ол кісілерді қадірлеу, барынша құрметтеу – біздің басты парызымыз. Жалпы, жыл сайын мереке қарсаңында облыс әкімінің қолдауымен ардагарлерімізге барынша әлеуметтік көмек көрсетіліп келеді. Атап айтқанда, Ұлы Отан соғысына қатысқан 4 ардагерге 2 510 560 теңгеден біржолғы жәрдемақы төленетін болады. Сонымен қатар, Ұлы Отан соғысы жылдарында тылдағы жанқиярлық еңбегі және мінсіз әскери қызметі үшін арнайы медальдармен марапатталған ардагерлерге 221,5 мың (60 АЕК) теңгеден беріледі. Ал, Ұлы Отан соғысында ерлікпен қаза тапқан жауынгерлердің жұбайларына және қайтыс болған мүгедек ардагерлердің жұбайларына 147,6 мың (40 АЕК) теңгеден төленеді. Сондай-ақ, тылда кемінде алты ай жұмыс істеген 1 990 азаматқа 147,6 мың (40 АЕК) теңгеден беріледі. Бұдан бөлек, Жеңіс күні қарсаңында Чернобыль, Семей, Ауғанстанда болған ұрыстарда ерлік көрсеткен азаматтар да біржолғы әлеуметтік көмекпен қамтылатын болады, – деді Ғабит Жұмабекұлы.
Қарттарға, оның ішінде майдан ардагерлеріне қанша сый-құрмет көрсетсек те артық етпейді. Себебі, біздің бейбіт өміріміз, емен-жарқын, еш қиындықсыз жақсы заманда күй кешіп жатқанымыз сол кісілерге тікелей байланысты. Сондықтан, жанымызға жалау болған ардагерлерге қай кезде де ілтипат, реті келсе, көмек көрсетіп жүрейік. 9 мамыр – Жеңіс күні құтты болсын!
А.ЖАЙШЫЛЫҚ
Пікірлер жоқ. Бірінші болыңыз!