Алматыда қоғамдық көліктердің шамадан тыс толуы жолаушылардың наразылығын туғызды. Қала билігі автобус санын көбейту мәселені толық шешпейтінін мәлімдеді.
Алматыда қоғамдық көліктің лық толуы тағы да тұрғындардың шағымына себеп болды. Threads әлеуметтік желісінде қала тұрғыны №38 бағыттағы автобуста адам көптігінен есік аяғын қысып қалғанын айтып, бейнежазба жариялаған.
Желіде тараған кадрлардан автобустың іші жолаушыларға толып, адамдардың есік маңына дейін жиналғанын көруге болады. Бұл жағдай қоғамдық көліктегі жолаушылар қауіпсіздігі мен қарбалас уақыттағы тасымал мәселесін қайта көтерді.
Алматы қаласының көлік басқармасы аталған бағыттағы қозғалыс кестесі бұған дейін қайта қаралғанын хабарлады. Атап айтқанда, №38 автобустың рейстер саны көбейтіліп, көліктердің аялдап тұру уақыты қысқартылған. Алайда қабылданған шаралар жолаушылардың көптеп жиналу мәселесін толық шеше алмаған.
Ведомство мұның басты себебін қала көшелеріндегі көлік кептелісімен байланыстырады.
— Жолдардың шамадан тыс жүктелуіне байланысты, әсіресе қарбалас уақытта автобустар кешігіп, белгіленген қозғалыс кестесінен ауытқиды. Соның салдарынан автобустар арасындағы уақыт ұлғайып, аялдамаларда жолаушылар жиналып қалады. Сондықтан рейстер санын көбейту мен қозғалыс кестесін өзгерту қазіргі көлік жүктемесі сақталған жағдайда мәселені толық шешуге мүмкіндік бермейді. Бағытта автобустар жеткілікті болған күннің өзінде жол кептелісі олардың айналым уақытына, қозғалыс тұрақтылығына және белгіленген аралықты сақтауына айтарлықтай әсер етеді, – деп түсіндірді басқарма.
Осылайша, қаладағы қоғамдық көлік мәселесі автобус санымен ғана шектелмейтіні белгілі болды. Жол кептелісі салдарынан автобустардың аялдамаға уақытылы келмеуі жолаушылардың бір көлікке шамадан тыс жиналуына әкеліп отыр.
Ал тұрғындардың қауіпсіздігіне қатысты мәселе әлі де өзекті. Әсіресе автобустың есігі жабылған кезде жолаушының аяғы қысылып қалуы қоғамдық көліктегі қауіпсіздік талаптарының сақталуына қатысты сұрақ туғызады.
Дереккөз: Алматы қаласының көлік басқармасының түсіндірмесі, Threads/@kassymakyn_a.
Пікірлер жоқ. Бірінші болыңыз!