Халықаралық зерттеушілер тобы скандинавтық жүрістің депрессиямен күресте жоғары тиімділік көрсететінін ғылыми тұрғыдан дәлелдеді, деп хабарлайды halyqline.kz. Жаңа зерттеудің қорытындысы дене белсенділігі науқастың өмір сапасын қалпына келтіруде маңызды рөл атқаратынын аңғартады.
Зерттеуге депрессияның орташа және ауыр сатысы тіркелген, бұған дейін жүйелі жаттығумен айналыспаған 64 адам қатысты. Қатысушылар екі топқа бөлініп, он апта бойы аптасына екі рет кәсіби нұсқаушының жетекшілігімен скандинавтық жүріспен шұғылданды. Жаттығу кезіндегі жүктеме қалыпты деңгейде сақталуы үшін арнайы пульсометрлермен қадағаланып отырды, ал жетістікті өлшеуге «Бек депрессия сауалнамасы» атты халықаралық әдістеме қолданылды.
Нәтижесінде ғалымдар бақыланатын дене жаттығуы депрессия белгілерін едәуір төмендететінін анықтады. Ауыр түрімен ауыратын қатысушыларда жағдайдың жақсаруы алғашқы бес аптада-ақ байқалған. Он апталық курстың қорытындысы бойынша скандинавтық жүріспен айналысқан топтың елу үш жарым пайызында депрессияның клиникалық белгілері сейіліп, ремиссия тіркелді.
Зерттеушілердің пікірінше, скандинавтық жүріс депрессиямен күресудің қолжетімді, қарапайым әрі тиімді жолы. Бұл нәтиже бұған дейінгі америкалық ғалымдардың тұжырымымен де үндеседі, олардың пайымынша, дене белсенділігі мидың қалыпты жұмыс режиміне оралуына және жағымсыз ой үлгілерінен арылуына көмектеседі. Мамандар бұл әдісті медициналық оңалту бағдарламаларына қосымша терапия ретінде енгізудің орынды екенін атап өтті.
Анықтама ретінде айта кетейік, скандинавтық жүріс деген арнайы таяқтарға сүйеніп жүру тәсілі, ол шаңғы тебуге ұқсайды әрі жүру кезінде дененің көп бұлшықетін қатар жұмылдырады.
Сурет авторы: happytreecamp.ru
Пікірлер жоқ. Бірінші болыңыз!