4 қарашада еліміздің сегіз қаласында атмосфералық ауаның ластануына ықпал ететін қолайсыз метеорологиялық жағдайлар күтіледі. Бұл туралы «Қазгидромет» мәлімдеді, деп хабарлайды Halyqline.kz.
Синоптиктердің болжамынша, қолайсыз метеорологиялық жағдайлар Қарағанды, Жезқазған, Балқаш, Теміртау, Алматы, Астана және Ақтөбе қалаларында байқалуы мүмкін. Ал Атырауда мұндай жағдай түнгі уақытта күтіледі.
«Қазгидромет» мамандарының түсіндіруінше, қолайсыз метеорологиялық жағдайлар желдің болмауы немесе әлсіз соғуы, тұман және температуралық инверсия кезінде қалыптасады. Мұндайда атмосферадағы зиянды заттар ауаға тарап үлгермей, жер бетіне жақын қабатта шоғырланады. Соның салдарынан елді мекендерде ауа сапасы нашарлауы ықтимал.
Әсіресе өнеркәсіп кәсіпорындары мен автокөлік қозғалысы көп қалаларда мұндай құбылыстың әсері айқынырақ сезілуі мүмкін. Қолайсыз метеорологиялық жағдайлар кезінде мамандар тұрғындарға ашық ауада ұзақ уақыт жүрмеуге, ауыр дене жаттығуларын шектеуге кеңес береді. Тыныс алу жолдарының созылмалы аурулары бар адамдар мен балалардың сақтық шараларын ұстанғаны жөн.
Айта кетейік, қолайсыз метеорологиялық жағдай туралы болжам атмосферадағы зиянды заттардың шекті мөлшерден асқанын білдірмейді. Ол ластаушы заттардың жиналуына қолайлы ауа райы қалыптасуы мүмкін екенін ескертеді.
Пікірлер жоқ. Бірінші болыңыз!