Бүгінгі сатира
(«Далбаса дөкейлер» сатиралық романымнан үзінді)
Ұран керек. Мемлекетімізге, елімізге, бәрімізге. Ұран деген ұнтақ емс, жантақ емес, ұран дегеніміз – адамдарды рухтандыратын, алға жетелейтін, желкелейтін лейкомотив. Баяғыда, кеңес өкіметі кезінде: «Барлық елдердің пролетарлары, бірігіңдер!», «бірінші май жасасын!», «КПСС жасасын!» деген ұрандар болатын. «Екінші май жасасын, үшінші май жасасын!» деп ұрандатпайды, тек: «бірінші май жасасын! Ура, ура!» дегенде делебеміз қозып, уралайтынбыз. Бүгінде жөні түзу ұран жоқ, кейбір шенеуніктердің үйінде кәдімгі құран жоқ. Сондықтан, заманауи ұрандардың біразын айтайын, сіздер уралап отырың¬һыздар, қатесі болса, туралап отырыңыздар!
– Барлық елдердің есалаңдары, бірігіңдер! Уралайсыз ба? Неге үндемей қалдыңыздар? Есалаң бастықтар, есалаң заңдар, есалаң полицейлер, есалаң соттар бар ғой арамызда? Немесе: «барлық елдердің күлегештері, бірігіңдер!» Қандай тамаша, ә? Күлкі құдіретті күш десек, күлегештер де бірігуі керек. Сонда, беттері бетондалып қалғандардың езулері жібитін шығар? Келесі ұрандар:
– Жасасын, жайынауыз, жалмауыз жемқорлар күні!
– Жасасын, айыппұлдар елі!
– Жасасын, қазақтың қаракөз жалаңаштары!
– Бәріміз біріміз үшін, біріміз тек өзі үшін!
– Ит итті жұмсасын, ит құйрығын жұмсасын, ура! Мұндай ұран жоқ енді, мақал-мәтел болуы мүмкін. Тағы қандай бар еді?
– Ыңқ, ыңқ жасасын!
– Ол немене? Сондай да ұран болушы ма еді?
– Енді ыңқ-ыңқ еткізетін кейбір жолдарымызды айтамын да…
– Аа, мен басқаша ойлап қалдым ғой…
– Басқаша ойлар жасасын!
– Мағынасы жоқ тойлар жасасын!
– Кетік тісті кемпірлер жасасын, әдемі жемпірлер жасасын!
– Мұндай ұран болмайды.
– Шетел асқан, тұра қашқан қыздар жасасын!
– Бөлке нанды бөліп жейік, жүзге, руға бөлінбейік!
– Пейілдеріміз ақ болсын, шалбарымыз шақ болсын!
– Энергия, ток болсын, дұшпанымыз шок болсын!
– Ватсап өсекшілері, «группаға» бірігіңдер!
– Фейсбукта ұрыспайық, инстаграмда жұлыспайық!
Міне, достарым, осындай қызық-қызық ұран болсын, бүгіннен бастап, әрбір үйде құран болсын!
Мұхтар ШЕРІМ.
Шымкент қаласы
Фото: advokat-v-ispanii.ru
Пікірлер жоқ. Бірінші болыңыз!