Иран жексенбі күні кешке Израиль аумағына қарай бірнеше баллистикалық зымыран ұшырды, деп хабарлайды halyqline.kz.
Израиль армиясының мәліметінше, зымырандар елдің солтүстік бөлігіне бағытталған. Әуе қорғаныс жүйелері іске қосылып, шабуыл салдарынан зардап шеккендер туралы ақпарат түспеген. AP агенттігінің жазуынша, бұл Иранның сәуір айында жарияланған атысты тоқтату режимінен кейін Израильге жасаған алғашқы тікелей зымыран шабуылы болды.
Халықаралық ақпарат құралдары шабуылдың Израильдің Бейруттың оңтүстігіндегі нысандарға жасаған әуе соққысынан кейін болғанын жазды. Израиль тарапы бұл соққылардың “Хезболлаға” қатысты нысандарға бағытталғанын мәлімдеген. Ал Тегеран зымыран шабуылын осы әрекетке жауап ретінде түсіндіріп отыр. The Guardian дерегінше, Иран шамамен 10 баллистикалық зымыран ұшырған, олардың бір бөлігі әуеде қағылған немесе елсіз аумаққа түскен.
Шабуылдан кейін АҚШ президенті Дональд Трамп Иранды әскери әрекетті тоқтатып, келіссөзге қайта оралуға шақырды. Ол бұл соққылар Вашингтон мен Тегеран арасындағы ықтимал келісімге кедергі келтірмеуі керек екенін айтқан. Сонымен қатар Трамп Израиль премьер-министрі Биньямин Нетаньяхуға жауап соққы жасамауға кеңес беретінін жеткізген.
Reuters мәліметінше, Израиль кейін Ирандағы бірқатар нысанға соққы жасаған. Бұл жағдай АҚШ-тың арағайындық жасауға тырысқан дипломатиялық процесін күрделендіріп отыр. Себебі аймақтағы әрбір жаңа соққы атысты тоқтату тәртібін әлсіретіп, Иран мен Израиль арасындағы қақтығыстың қайта өршу қаупін күшейтеді.
Иранның әскери басшылығы операция жалғасуы мүмкін екенін ескерткен. Израиль тарапы да өз аумағына бағытталған кез келген жаңа шабуылға қатаң жауап беретінін мәлімдеді. Осыған байланысты Таяу Шығыстағы ахуал қайта шиеленісіп, халықаралық қауымдастық тараптарды ұстамдылыққа шақырып отыр.
Қақтығыстың салдары тек Израиль мен Иранға ғана қатысты емес. Таяу Шығыс әлемдік мұнай нарығы, теңіз жолдары, аймақтық қауіпсіздік және АҚШ-тың сыртқы саясаты үшін маңызды аймақ саналады. Сондықтан Иран мен Израиль арасындағы кезекті әскери қимыл халықаралық саясаттағы ең өзекті мәселелердің біріне айналды.
Пікірлер жоқ. Бірінші болыңыз!