Иран мен Израиль бір-біріне бағытталған шабуылдарды әзірге тоқтатты. Бұл туралы Reuters агенттігі хабарлады.
Соңғы шиеленіс Израильдің Бейрут маңындағы нысандарға соққы жасауынан кейін басталған. Бұған жауап ретінде Иран Израиль аумағына қарай зымырандар ұшырған. Израиль әскері Ираннан ұшырылған зымырандарды анықтап, әуе қорғаныс жүйелері оларды қағып түсіргенін мәлімдеді.
Reuters мәліметінше, жағдайдың одан әрі ушығып кетпеуіне АҚШ президенті Дональд Трамптың үндеуі әсер еткен. Ол Израиль мен Иранды шабуылды жалғастырмауға шақырып, тараптар бір-біріне жауап бергенін, енді жаңа соққы қажет емес екенін айтқан.
Израиль тарапы Иранға қарсы жаңа соққы жасалмайтынын білдірді. Ал Тегеран Израиль мен Ливанға шабуыл жасалмаса, жауап қайтармайтынын мәлімдеген. Дегенмен екі тарап та жағдай қайта ушыққан жағдайда әрекет ету құқығын сақтап отыр.
Reuters жазуынша, бұл оқиға АҚШ пен Иран арасындағы келіссөздер жүріп жатқан тұста болған. Вашингтон Таяу Шығыстағы жағдайдың қайта өршуі келіссөздерге кедергі келтірмеуін қалайды. Израиль болса Ливандағы «Хезболлаға» қарсы әрекетін Иранмен жасалатын ықтимал келісімнен бөлек қарастыруды талап етіп келеді.
Сарапшылардың айтуынша, тараптардың шабуылды тоқтатуы аймақтағы жағдайдың толық тұрақтанғанын білдірмейді. Себебі Израиль, Иран және Ливан бағыты бойынша әскери-саяси ахуал әлі де күрделі күйінде қалып отыр.
Пікірлер жоқ. Бірінші болыңыз!