Біріккен Араб Әмірліктерінің астанасы Әбу-Дабиде Ресей, Украина және АҚШ арасындағы үшжақты бейбіт келіссөздер қайта басталды. Тоғыз айлық үзілістен кейін өткен алғашқы кездесу төрт жарым сағатқа созылғанымен, тараптар негізгі мәселелер бойынша ортақ шешімге келген жоқ, деп хабарлайды Halyqline.kz.
Келіссөздердің алғашқы кезеңі 10 қарашада өтті. Бұған дейін Ресей, Украина және АҚШ делегациялары осы форматта соңғы рет 2026 жылдың ақпанында кездескен болатын. Үшжақты диалогтың қайта жандануына Вашингтонның соғысты тоқтатуға бағытталған дипломатиялық бастамалары ықпал етті.
Әбу-Дабидегі кездесуге Ресей тарапынан президенттің көмекшісі Владимир Мединский, Украина тарапынан Рустем Умеров бастаған делегациялар қатысты. АҚШ атынан президент Дональд Трамптың арнайы өкілі Стив Уиткофф пен Джаред Кушнер келді. Тараптар соғысты тоқтату жолдарын, қауіпсіздік кепілдіктерін және Еуропадағы қауіпсіздік жүйесіне қатысты мәселелерді талқылады.
Алайда келіссөздегі ең күрделі мәселе бұрынғысынша шешімін таппай отыр. Мәскеу Донбасс аумағын толық бақылауына беруді талап етеді. Ал Киев аумақтық мәселелерді қазіргі майдан шебін негізге ала отырып қарастыруды жақтайды. Украина соғысты тоқтату үшін атысты доғару және болашақта Ресейдің қайта шабуыл жасауына жол бермейтін сенімді қауіпсіздік кепілдіктері қажет екенін мәлімдеп келеді.
Ресей тарапы әзірге дереу атысты тоқтатуға келісім бермей отыр. Ресейдің Сыртқы істер министрі Сергей Лавров бітімнен кейін қандай шаралар қабылданатыны анықталмайынша, Мәскеу атысты тоқтату туралы шешімді қолдамайтынын жеткізді.
Соған қарамастан, келіссөзге қатысқан тараптардың алғашқы бағасы біршама оң болды. АҚШ Мемлекеттік хатшысы Марко Рубио кездесуді нәтижелі деп сипаттағанымен, келісімге келу үшін әлі көп жұмыс атқарылуы керектігін айтты. Украина Президенті Владимир Зеленский де келіссөздердің мазмұнды өткенін жеткізді.
Алғашқы күні тараптар гуманитарлық мәселелерге де тоқталды. Атап айтқанда, әскери тұтқындарды алмасу, Ресейде ұсталып отырған украиналық азаматтарды және Украинадан әкетілген балаларды қайтару мәселелері қаралды. Сонымен қатар соғысты бәсеңдетудің ықтимал жолдары талқыланды.
Дипломатиялық келіссөздер жүріп жатқанда майдандағы қақтығыстар тоқтаған жоқ. 10 қарашада Ресей Украинадағы энергетикалық инфрақұрылым нысандарына кезекті соққылар жасады. Украинаның бірқатар өңірінде электрмен жабдықтау бұзылып, бейбіт тұрғындар арасында қаза тапқандар тіркелді.
Осылайша Әбу-Дабидегі кездесу тараптарды қайта келіссөз үстеліне жинағанымен, соғысты тоқтататын нақты келісім әзірге жасалған жоқ. Басты кедергі ретінде аумақтық даулар мен қауіпсіздік кепілдіктеріне қатысты ұстанымдардың алшақтығы сақталып отыр.
Үшжақты келіссөздердің екінші күні 11 қарашаға жоспарланған. Тараптардың қандай шешімге келетіні келесі кездесулердің нәтижесінде белгілі болады.
Пікірлер жоқ. Бірінші болыңыз!