Қазақстанда жеңілдетілген салық режиміндегі кәсіпкерлермен жасалған мәмілелер бойынша шығыстарды шегерімге жатқызуға қойылған тыйымды алып тастау әзірге жоспарланбайды. Премьер-министрдің орынбасары – ұлттық экономика министрі Серік Жұманғарин Салық кодексінің негізгі ережелерін қайта қарауға әлі ерте екенін мәлімдеді, деп хабарлайды Halyqline.kz.
13 қазанда Үкіметте өткен брифингте журналистер министрден жаңа Салық кодексіне қатысты кәсіпкерлердің шағымдары туралы сұрады. Әсіресе жалпыға бірдей салық режимінде жұмыс істейтін компаниялардың жеңілдетілген режимді қолданатын кәсіпкерлерден тауар немесе қызмет сатып алғандағы шығындарын салықтық шегерімге жатқыза алмауы бизнес өкілдерінің наразылығын туғызған.
Жұманғариннің айтуынша, Үкімет әзірге бұл талапты қайта қарауды жоспарлап отырған жоқ.
— Біз ештеңені өзгертуді жоспарлап отырған жоқпыз. Өйткені Салық кодексі енді ғана жұмыс істей бастады. Тоғыз ай өтті. Келісіңіздер, жұмыс істеп үлгермей жатып, оның негізгі баптарына өзгерістер енгізу ақылға қонымсыз әрекет болар еді, – деді министр.
Ол қазіргі салық жүйесінде кәсіпкерлік қызметтің ерекшелігіне қарай әртүрлі режимдер қарастырылғанын түсіндірді. Жұманғариннің пікірінше, өзге компаниялармен жұмыс істейтін бизнес үшін жалпыға бірдей салық салу тәртібі, ал тауарлар мен қызметтерді тікелей тұтынушыларға ұсынатын кәсіпкерлер үшін арнаулы салық режимдері көзделген.
Алайда кәсіпкерлердің наразылығына себеп болған мәселе осы екі жүйенің өзара байланысына қатысты. Жалпыға бірдей режимдегі компания жеңілдетілген режимді пайдаланатын кәсіпкерден тауар немесе қызмет сатып алса, сол шығынды корпоративтік табыс салығын есептеу кезінде шегерімге жатқыза алмайды. Бұл талаптың салдарынан ірі компаниялардың шағын кәсіпкерлермен жұмыс істеуге қызығушылығы төмендеуі мүмкін деген алаңдаушылық айтылып келеді.
Министрдің сөзінше, жаңа нормалардың тиімділігін бағалау үшін уақыт қажет. Оның пікірінше, Салық кодексі кемінде бір жарым жыл жұмыс істегеннен кейін ғана негізгі ережелерін қайта қараудың қажеттілігіне толық баға беруге болады.
Айта кетейік, жаңа Салық кодексі Қазақстанда 2026 жылғы 1 қаңтардан бастап күшіне енді. Соның нәтижесінде арнаулы салық режимдерінің саны жетіден үшке дейін қысқартылды.
Дегенмен Жұманғариннің негізгі нормаларды өзгертпеу жөніндегі мәлімдемесі салық заңнамасына мүлдем түзету енгізілмейді дегенді білдірмейді. 3 қарашада Үкімет басшысының орынбасары кәсіпкерлердің ұсыныстары негізінде әзірленген жекелеген түзетулер пакетін жыл соңына дейін Парламенттің қарауына ұсыну жоспарланғанын хабарлады.
Осылайша Үкімет салық реформасының негізгі бағытын сақтауды көздеп отыр. Ал кәсіпкерлер көтерген даулы шегерім мәселесі әзірге шешімін тапқан жоқ.
Пікірлер жоқ. Бірінші болыңыз!