Қоғамдағы қауіпсіздік тек сыртқы тәртіппен өлшенбейді. Адамның психологиялық саулығы, жанындағы әріптесіне деген жауапкершілігі мен қиын сәтте қолдау көрсете білуі де – қауіпсіз қоғам қалыптастырудың маңызды бөлігі.
Осы бағытта ҚР Ішкі істер министрлігінің ҚАЖ департаменті №37 мекемесініңжеке құрамына 2026 жылдың 7 қазан күні «Сенімен Болашақ» РҚБ Қызылорда облыстық филиалының мамандары«Үнсіз дабыл: суицидтік мінез-құлықтың белгілерін қалай байқаймыз?» тақырыбында психологиялық тренинг өткізді.
Тренингтің негізгі мақсаты – қызметкерлердің суицидтік қауіптің ықтимал белгілерін дер кезінде байқауына, әріптесімен дұрыс қарым-қатынас орнатуына және қиын жағдайға тап болған адамды жалғыз қалдырмай, тиісті мамандарға уақытылы жүгінуіне қажетті дағдыларды қалыптастыру.
Кездесу барысында қатысушылар адамның мінез-құлқындағы және эмоционалдық жағдайындағы өзгерістерге назар аударудың маңызын талқылады. Кей жағдайда адамның ішкі күйзелісі сырт көзге бірден байқала бермейді. Сондықтан жақын адамның көңіл күйіндегі өзгерісті елемей қалмау, тыңдай білу және дер кезінде қолдау көрсету – маңызды қадам.
Психологиялық тренинг тек ақпарат берумен шектелмей, қатысушыларды өзара пікір алмасуға, жағдайды саралауға және қиын сәтте дұрыс әрекет ету жолдарын ой елегінен өткізуге бағытталды.
Сонымен қатар кездесу Ахмет айлығы аясындағы ағартушылық бағытпен сабақтасты. Мекеме қызметкерлеріне «Ел – бүгіншіл, менікі – ертең үшін» тақырыбында ақпараттық лекция өткізіліп, Бірлестіктің миссиясы, жұмыс форматы мен негізгі бағыттары таныстырылды.
Лекция барысында азаматтық сана мен азаматтық жауапкершіліктің мәні кеңінен сөз болды. Ахмет Байтұрсынұлының ел болашағына бағытталған ойлары бүгінгі күнмен үндес екені атап өтілді. Ұлт ұстазының «Ел – бүгіншіл, менікі – ертең үшін» деген ұстанымы әр азаматтың өз ісіне жауапкершілікпен қарап, келешекке қызмет етуінің маңызын аңғартады.
Бұл ұстаным ҚАЖ қызметкерлерінің күнделікті қызметімен де тікелей үндеседі. Себебі қылмыстық-атқару жүйесінде қызмет ету – тек бүгінгі міндетті орындау емес. Бұл – адамның тағдырына, қоғамның қауіпсіздігіне және болашақтағы қоғамдық тұрақтылыққа жауапкершілікпен қарау.
Қоғамның ертеңі бүгінгі әрекеттен басталады. Бір адамның жанындағы адамды түсініп, дер кезінде қолдау көрсетуі үлкен қауіптің алдын алуы мүмкін. Ал азаматтық жауапкершілік әр адамның өз қызметіне адалдығынан, қоғамға пайдалы іс жасауынан және келешекке деген көзқарасынан көрінеді.
Сондықтан бүгінгі кездесудің негізгі ойы – адамды дер кезінде байқау, тыңдау, қолдау және қажет кезде кәсіби көмекке бағыттау – баршамызға ортақ жауапкершілік. Бүгінгі жауапкершілік – ертеңгі қауіпсіз қоғамның негізі.
«Сенімен Болашақ» РҚБ Қызылорда облыстық филиалы
Пікірлер жоқ. Бірінші болыңыз!