Қазақстан құрамасы Ұлттар лигасындағы жаңа маусымды бір ұпаймен бастады. Ұлттық команда алдымен Фарер аралдарымен сырт алаңда 1:1 тең түссе, кейін Словакиядан 1:2 есебімен жеңілді. Екі матч та жаңа бапкер Джон ван ’т Схип үшін алғашқы ресми сынақ болды.
Фарер аралдарына қарсы кездесуде Қазақстан ерте жіберіп алған голдың қарымтасын қайтара алды. Темірлан Ерлановтың баспен соққан добы есепті теңестірді. Кейін жеңісті жұлып алуға мүмкіндік болғанымен, соңғы шешімдерде дәлдік жетіспеді. Осылайша, құраманың басты мәселелерінің бірі – шабуылдағы мүмкіндікті голға айналдыру екені тағы байқалды.
Словакиямен кездесуде жағдай күрделірек болды. Қарсылас допқа көбірек иелік етіп, ойын тізгінін өз қолында ұстады. Соған қарамастан Қазақстан Рамазан Кәрімовтың голынан кейін есепті теңестіріп, ұзақ уақыт бойы ұпайға жақын тұрды. Алайда матчтың аяқталуына сегіз минут қалғанда Давид Ганцко стандарттық жағдайдан жеңіс голын соқты.
Ван ’т Схиптің өзі де командасының ойынына көңілі толғанын жасырмады. Бас бапкер қарсыластың топтағы ең мықты команда әрі өз алаңында ойнағанын ескерсек, Қазақстанның жақсы ойын көрсеткенін айтты.
– Бірінші голды концентрацияны жоғалтып алғаннан кейін жібердік. Алайда Рамазан Кәрімовтың өте әдемі голының арқасында ойынға қайта орала алдық. Жігіттер біз жаттықтырған схема мен тактика бойынша ойнады, — деді Джон ван ’т Схип.
Бас бапкер екінші таймдағы тактикалық шешіміне де тоқталды. Оның айтуынша, Мрынскийді алаңға шығару арқылы қорғаушыларға көмектесу және оң қанат арқылы шабуылды жылдамдату көзделген.
– Біздің тағы гол соғуға жақсы мүмкіндіктеріміз болды. Мрынский мен Рамазан Оразовтың есепті өзгертуге мүмкіндігі бар еді. Алайда нәтижесінде екінші голды Словакия соқты. Жігіттерге ойыны мен алаңдағы бар күшін салғаны үшін үлкен рақмет айтқым келеді, — деді маман.
Ван ’т Схип құрам таңдау мәселесіне де түсініктеме берді. Оның айтуынша, Словакияға қарсы матчта негізгі құрамда Қазақстан чемпионатында ойнайтын тоғыз футболшы алаңға шыққан. Сонымен қатар, бірінші кездесуге қатыспаған ойыншыларға мүмкіндік берілген. «Құрамды таңдағанда футболшылардың физикалық жағдайын да ескердік. Бірінші матчқа қатыспаған ойыншыларға өздерін көрсетуге мүмкіндік бердім» деді бас бапкер.
Екі ойынның нәтижесі әртүрлі болғанымен, ортақ көрініс бар. Қазақстан қорғаныста жинақы ойнауға және қарсы шабуыл арқылы мүмкіндік іздеуге тырысады. Бірақ шабуылдағы соңғы пас, соққы және шешім қабылдау сапасын арттыру қажет. Словакиямен болған кездесу халықаралық деңгейде бір ғана сәттің өзі ойын тағдырын өзгерте алатынын көрсетті.
Стандарттық жағдайлар да назар аударарлық. Фарермен матчта Қазақстан бұрыштамадан гол соқса, Словакия дәл осы қарумен біздің қақпаны нысанаға алды. Демек, команда бұл компонентті шабуылда тиімді пайдалана алады, алайда қорғаныста әлі де жұмыс бар.
Әрине, жаңа бапкердің жұмысын екі кездесуден кейін бағалау ерте. Дегенмен алғашқы ойындар команданың қазіргі бағытын аз да болса аңғартты. Қазақстанның қорғаныста тәртіп сақтауға шамасы жетеді, ал шабуылда қауіпті сәттер жасауға мүмкіндігі бар. Ендігі міндет – сол мүмкіндіктерді нәтижеге айналдырып, жекелеген жақсы эпизодтарды тұрақты ойынға ұластыру. Ал оның қаншалықты жүзеге асатынын алдағы матчтар көрсетеді.
А.ЖАЙШЫЛЫҚ
Пікірлер жоқ. Бірінші болыңыз!