– Қызылорда облысы аумағына Сырдария өзені арқылы секундына 778 текше метр көлемінде су түсуде.
Осы жылы 21 ақпан мен 4 наурыз аралығында Қызылорда қаласы мен Сырдария, Жалағаш, Жанақорған, Шиелі аудандарының өзен бойындағы елді мекендері аумағынан сеңнің қауіпсіз жүруін қадағалаудың нәтижесінде төтенше жағдайсыз өтті.
Дегенмен, су өзен арнасынан асып, Қармақшы ауданы, Қызылтам елдімекені тұсындағы Далдабай, Қызылтам жолының су басу қаупі бар аумағына су жайылған. Жолаушылардың қауіпсіздігі үшін облыстық маңызы бар «Жалағаш-Жосалы» бағытындағы (Жосалыдан 43 км, Жалағаштан бері 31 км, Далдабай мен Қызылтам елді мекендерінің арасы) жол уақытша жабылды. Су алу аймақтарындағы шаруашылық иелерінің мүліктеріне, тұрғын жай ғимараттарына т.б. зақым келмеген.
Елдімекендерге ешқандай қауіп жоқ. Қазір жауапты салалармен арнайы жұмыстар жүргізіліп, жағдай толық бақылауға алынған.
Аталған жол – екі елді мекенді байланыстыратын жол екенін еске саламыз. Қызылтам, Қармақшы және Далдабай елді мекеніне Жалағаш ауданы жағынан баратын ішкі жол бар. Сол себептен оның үлкен жол қатынасына кедергі келтірмейді. Ал, «Батыс Еуропа-Батыс Қытай» халықаралық автожолы ашық, қалыпты жұмыс жасауда.
Айта кету керек, 25 наурызға дейін Арал ауданынан мұз толықтай жүріп өтетіні болжануда.
Бүгінде су басу қаупі бар аймақтарға арнайы техника, күш-құралдары бар жауапты мекемелер бекітілді (29 су басу қауіпі бар аймаққа 136 мекеме бекітілген. Оларда 368 арнайы техника және 1 083 адам күші бар).
Су тасқынына қарсы материалдық-техникалық қорлар қажетті көлемде қалыптастырылды. Ықтимал су тасқыны кезеңінде халықты көшіру пункттері дайын.
Сондай-ақ, тиісті сала мамандарымен («Қазгидромет» және «Қазсушар» РМК Қызылорда филиалдары) Сырдария өзені арнасындағы 10 су бекеттері мен 4 су тораптарында су деңгейіне күнделікті мониторинг жүргізілуде. Елдімекендерге ешқандай қауіп жоқ екендігін тағы да назарға саламыз.
Пікірлер жоқ. Бірінші болыңыз!