Төтенше жағдай жарияланғалы 1,5 айдан асты. Төрт қабырғада жата-жата жалыққан жұрт әлсін-әлсін әлеуметтік желіде жазба қалдырып, ой бөлісуде. Кейбірі осы уақытты құр жібермей кітап оқып, рухани жаңғырып жатқан көрінеді. Дегенмен, бес саусақ бірдей емес. Ел болған соң есерсоқтар да кездеседі. Біз төтенше жағдай кезінде тәртіп бұзған қазақстандықтар туралы айтпақпыз. Яғни, жарияланған ескертулерді елемей, тәртіп бұзғандар.
Қарапайым жұрттан бұрын төтенше жағдай режимін Қызылордада алғашқылардың бірі боп ауыл әкімі бұзды. Естеріңізде болса, шиелілік шенеунік карантин кезінде ауылында той өткізуге жол берген. Одан қалды сол тойдың басы-қасында өзі жүріпті. Кейіннен ол қызметінен босатылды.
Ал Павлодар қаласында балконда кәуап пісірген азамат жазаға тартылды. Тұрғын бұл іс-әрекетін телефонға түсіріп, әлеуметтік желіде жүктеген. Құзырлы орган қызметкерлері желіккен жігітті дер кезінде анықтап, қолға түсірді. Балконда от жағып, кәуап пісіргені – өрт қауіпсіздігі ережелеріне қайшы келіп, басқа тұрғындардың өміріне қауіп төндірді. Павлодар қаласы төтенше жағдайлар басқармасының қызметкерлері кебаб ұнататын адамды ҚР ӘҚБтК 410-бабы (өрт қауіпсіздігі талаптарын бұзғаны немесе сақтамағаны үшін) бойынша әкімшілік жауапқа тартты.
Карантин кезінде Тараздағы сұлулық салонының қызметкері төтенше жағдай режимін бұзған. 25 жастағы шаштараз төтенше жағдай режиміне қарамастан, жергілікті жоғары оқу орындарында білім алып жатқан түркіменстандық бес азаматтың шашын қысқартып беріпті. «Аталған құқықбұзушылықты полиция қызметкерлері жаяу патрульдеу кезінде анықтады. Төтенше жағдай режимін бұзғаны үшін шаштараздың иесіне, шеберге және бес азаматқа қатысты ҚР ӘҚБтК-нің 476-бабы бойынша әкімшілік хаттамалар толтырылды. Қызмет көрсету кезінде шебер мен тұтынушы арасында жақын және ұзаққа созылатын байланыстың болуына байланысты карантин кезінде мұндай кәсіпорындардың қызметіне қатаң тыйым салынады» деп жазды polisia.kz.
Ескертуді елемегендер қатарында ақтөбеліктер де бар. Ресми органның мәліметіне сенсек, төтенше жағдай режимін бұзған бес ер адам ұсталды. Коронавирус инфекциясының алдын алу шараларын жүргізу барысында полицейлер қала моншаларының бірінде облыс орталығының 5 тұрғынын анықтаған. Режим бұзған адамдар деструктивті діни ағымның жақтаушылары болып шықты. Монша иесіне және бес клиентке ӘҚБтК-нің 476-бабы (төтенше жағдай режимін бұзу) бойынша әкімшілік хаттама толтырылды. Мамандандырылған әкімшілік соттың үкімімен монша иесі мен клиенттер әкімшілік жазаға тартылды.
Жазаға тартылғандардың арасында танымал әншілер де бар. Алматыда белгілі әнші Ернар Айдар карантин режимін бұзғаны үшін ұсталды. Әнші және тағы 12 адам бір бөлмеге жиналып, ұтыс ойынын өткізген. Ең қызығы, ұтысқа ойнатпақ болған 4 автокөлік те бір күнге жалға алынған боп шықты.
– Ұстауды экономикалық тергеу қызметінің қызметкерлері жүргізді. Негізгі өндіріс – осы бөлімшеде. Полиция, өзінің юрисдикциясына сәйкес, бұл жағдайда қамауға алынған адамдарға карантин режимін бұзғаны үшін шаралар қолдануға құзырлы. ҚР Әкімшілік құқық бұзушылық туралы кодексінің 476-бабына сәйкес әкімшілік хаттамалар толтырылды. Іс материалдары шешім қабылдау үшін Алматы қаласының мамандандырылған ауданаралық әкімшілік сотына жіберілді, – деді Медеу аудандық Полиция басқармасының басшысы Болат Тотыбаев.
Айтпақшы, төтенше жағдай кезінде елімізде қылмыс саны әжептәуір азайыпты. Ұсталғандардың дені – ескертуді елемегендер.
Естеріңізге сала кетейік, 11 мамырда жарияланған төтенше жағдай режимі аяқталады. Десе де, президент сақтық шараларын сақтауды тапсырды.
Құқық-ақпарат
Пікірлер жоқ. Бірінші болыңыз!