Германия барлау қызметінің бұрынғы басшысы Август Ханнингке қатысты тыңшылық дауы АҚШ пен Германияның қауіпсіздік саласындағы ынтымақтастығына әсер етуі мүмкін. Вашингтон неміс барлау қызметіне ақпарат алмасу тәртібін қайта қарауы ықтимал екенін ескерткен, деп хабарлайды Halyqline.kz.
WDR, NDR және Süddeutsche Zeitung журналистерінің зерттеуіне сәйкес, АҚШ арнайы қызметтерінің ескертуі Германияның Федералдық барлау қызметіне (BND) бұрынғы басшысы Август Ханнинг ұсталғаннан кейін бірнеше күн өткенде жеткен.
Ханнинг 6 қазанда мемлекеттік құпияларды заңсыз иелену, тыңшылық әрекет және мемлекетке опасыздық жасауға оқталу күдігімен ұсталған болатын. Тергеу мәліметінше, ол бұрынғы көмекшісі Манфред Д. арқылы ұзақ жылдар бойы құпия құжаттар алып отырған. Тергеушілер бұл ақпараттың бір бөлігі шетелдік құрылымдарға берілуі мүмкін деп есептейді. Ханнингтің қорғаушысы тағылған айыптарды жоққа шығарады.
Неміс журналистерінің мәліметінше, Вашингтон BND-мен ынтымақтастықты қайта қарау мүмкіндігін ескерткенімен, Германияның маңызды серіктес болып қала беретінін жеткізген. АҚШ тарапы террорлық шабуылдар сияқты тікелей қауіп-қатерлер туралы ақпарат беруді жалғастыруға ниетті.
Аталған хабарлама Германия барлау қызметінде алаңдаушылық туғызған. BND бөлімшелерінің басшыларына америкалық әріптестерден келетін ақпарат көлемі мен сапасында қандай да бір өзгеріс байқалса, дереу хабарлау тапсырылған.
Германияның қауіпсіздік органдарындағы дереккөздер ынтымақтастық қалыпты жағдайда жалғасып жатқанын, тек жекелеген жұмыс кездесулері кейінге шегерілгенін айтады. Алайда кейбір барлау қызметкерлері АҚШ тарапынан берілетін мәліметтердің көлемі мен сапасы төмендегенін байқаған.
Әзірге Вашингтонның Германияға барлау ақпаратын беруді ресми түрде қысқартқаны расталған жоқ. BND мен АҚШ елшілігі бұл мәселеге қатысты түсініктеме бермеген.
Август Ханнинг Германияның Федералдық барлау қызметін 1998–2005 жылдары басқарған. Оның ісі бойынша тергеу жалғасып жатыр.
Пікірлер жоқ. Бірінші болыңыз!