Ұлттық құрылтайда сөйлеген Мемлекет басшысы Қасым-Жомарт Тоқаев экономикалық саясаттың жүзеге асырылуына қатысты бірқатар сын-ескертпе жасап, жауапкершілігі жоғары кезеңде батыл шешімдер қабылдануы мүмкін екенін айтты.
Президент кейбір сала мамандарының ұстанымына көңілі толмайтынын ашық жеткізді.
— Бұл жағдайда біздің белгілі экономистерге қатысты елеулі претензияларым бар. Энергетика саласының өкілдеріне де ұқсас талап қойылады. Сірә, кадрлық шешімдер қабылдауға тура келетін сияқты, — деді Мемлекет басшысы.
Қасым-Жомарт Тоқаев Қазақстанның басты стратегиялық мақсаты – сапалы экономикалық өсімнің қарқынын сақтап қалу екенін атап өтті.
— Біздің негізгі стратегиялық мақсатымыз – сапалы экономикалық өсімнің қарқынын бәсеңдетпеу, — деді Президент.
Осы мақсатта бірқатар нақты қадамдар қолға алынғанын айтты.
— Осы мақсатта инфляцияны төмендету бағытындағы жұмыс басталды, жаңа инвестициялық цикл жарияланды, өзге де шешімдер қабылданып жатыр, — деді Қасым-Жомарт Тоқаев.
Мемлекет басшысы экономика мен бизнестің жаңа салық ережелері режиміне өтіп жатқанын атап өтіп, бұл кезеңде Үкімет пен жергілікті атқарушы органдарға ерекше жауапкершілік жүктелетінін айтты.
— Экономика мен бизнес жаңа салық ережелері режиміне өтуде. Үкімет пен жергілікті атқарушы органдар «фискалдық транзиттің» бірқалыпты, қақтығыссыз өтуін қамтамасыз етуге міндетті, — деді Президент.
Сонымен қатар Мемлекет басшысы жаңа Салық кодексін қолдануға қатысты қоғам тарапынан айтылып жатқан ұсыныстарды мұқият зерделеу қажеттігін атап өтті.
— Жаңа Салық кодексін қолдану мәселесіне қатысты қоғамның барлық салмақты, сындарлы ұсыныстарын мұқият қарау қажет. Қажет болған жағдайда түзетулер енгізілуі тиіс, — деді Қасым-Жомарт Тоқаев.
Президенттің айтуынша, қоғам трансформациясы кезеңінде кері байланыстың тиімді арналары ерекше маңызға ие.
— Қоғам өзгеріп жатқан жағдайда кері байланыстың тиімді арналары аса маңызды. Азаматтардың өтініштерімен жүйелі жұмыс жүргізу билікке халықтың нақты сұранысын білуге, олардың мұқтажын дер кезінде аңғарып, жедел жауап қатуға мүмкіндік береді, — деді Мемлекет басшысы.
Пікірлер жоқ. Бірінші болыңыз!