Құрметті Қызылорда қаласының тұрғындары мен қонақтары!
2025 жылы Қызылорда қаласының астана болғанына 100 жыл толып отыр. Осыған орай, 24 қыркүйек пен 27 қазан аралығында Қала күніне арналған мерекелік іс-шаралар айлығы өтеді.
Іс-шаралар аясында мәдени, спорттық және тарихи бағыттағы кең көлемді бағдарламалар ұйымдастырылған.
25 қыркүйек күні, сағат 11:00-де С.Айтбаев атындағы көркемсурет галереясында өткен ғасырлардан сыр шертетін «Қызылорда – мерейлі мекенім!» атты тарихи көрме ашылады.
Ал сағат 16:00-де Орталық алаңда Сыр шеберлерінің қолынан шыққан ұлттық туындылар ұсынылатын «Сыр шеберлерінің жұлдызды құрағы» көрмесі өтеді.
28 қыркүйек күні, сағат 09:00-де веломарафон «Абзал және Компания» толық серіктестігі ғимараты жанынан бастау алады.
1 қазан, сағат 15:00-де қалаға қарасты барлық кент пен ауылдық округтерде «Қарттарға құрмет – ұрпаққа міндет» атты тағылымды іс-шаралар өтеді.
3 қазан күні, сағат 10:00-де «Qyzylorda-OPEN» республикалық шахмат турнирі бастау алады. Ал сағат 16:00-де Қаламгерлер аллеясында жастардың көзімен бейнеленген қала бейнесі көрініс табатын «Қызылорда – жастар қаласы» фото көрмесі өтеді.
4 қазанда, сағат 16:00-де А.Тоқмағамбетов атындағы қалалық мәдениет үйінде Сыр өнерінің саңлақтарына арналған «Сыр сазгерлерінің сазды сәлемі» атты ән кеші өтеді.
8 қазан күні, сағат 11:00-де қаланың тарихи орындарында «Сәтті 100 қадам» атты танымдық квест ұйымдастырылса, сағат 19:00-де Жастар театрында Алаш қозғалысының ақиқатын арқау еткен «Жас Алаш, Шындық шырағы» атты тарихи драмасы көрерменге жол тартады.
10 қазан күні, сағат 11:00-де Қалалық жастар орталығында «Тарихы терең Сыр елі» атты интеллектуалды сайыс өткізіледі.
12-17 қазан аралығында, күн сайын сағат 10:00-де «Евразия» спорт кешенінде футзалдан Қазақстан Республикасы Бірінші лигасының ойындары өтеді.
17 қазан күні, сағат 18:00-де Сол жағалаудағы жаңа стадионда Қала күніне арналған ең ауқымды іс-шара – «БАҚ БАЙРАҚТЫ – ҚЫЗЫЛОРДАМ!» атты салтанатты гала-концерт ұйымдастырылады.
18 қазан күні, сағат 07:00-13:00 аралығында белгіленген орындарда ауылшаруашылық жәрмеңкесі және мерекелік концерттер өтсе, сағат 10:00-15:00 аралығында Орталық ипподромда «Алтын дән – 2025» атты республикалық ат бәйгесі көрермен назарына ұсынылады.
24 қазанда, сағат 10:00-де «Теннис» орталығында қазақ күресінен «Бала Барыс – 2025» біріншілігі жарысы басталады.
23-25 қазан күндері, күн сайын сағат 10:00-де «Сыр жұлдыздары» шығармашылық орталығында жасөспірімдер арасында стритболдан халықаралық турнир өтеді.
26-27 қазан күндері, сағат 10:00-де Сол жағалаудағы «Теннис» орталығында тоғызқұмалақтан, «Евразия» спорт кешенінде футзалдан қалалық ашық біріншіліктер өткізіледі.
Құрметті ағайын!
Қызылорда қаласының ғасырлық мерейтойы – өткенге тағзым етіп, болашаққа бағдар жасайтын ерекше тарихи сәт.
Осы бір ай бойы өтетін мазмұнды, мағыналы іс-шаралар – рухымызды көтеріп, бірлігімізді нығайтатын үлкен мереке.
Баршаңызды Қала күніне арналған іс-шараларға қатысып, Сыр елінің шежірелі мерекесін бірге атап өтуге шақырамыз!
Пікірлер жоқ. Бірінші болыңыз!