Еліміз бойынша құс еті бағытындағы фабрикалар саны 29-ды құраса, «Қармақшы құс» құс фабрикасы Сыр елінде алғашқы болып өз жұмысын бастады. Бұл туралы Қармақшы ауданы әкімінің баспасөз қызметі хабарлады.
Кәсіпкер Нұрлан Іздібаев аталмыш фабриканы ауданға қарасты Ақтөбе ауылдық округінен ашуының себебін: «Фабриканы ашу ойыма келгенде менің алдымда бірнеше нұсқа болды. Дегенмен, мен үшін ең бірінші кезекте туған топырағымды түлету мен жерлестерімді жұмыспен қамту мақсат болды. Менің жұмыспен қамтуға толық мүмкіндіктерім бола тұра, ауылдастарымның жұмыссыз жүруі маған үлкен сын болар еді. Сол себепті де өзімнің туып-өскен ауылыма тоқталдым», – деп түсіндірді.
«Қармақшы құс» ЖШС құс фабрикасының жобасына 3 млрд теңге инвестиция салынған. Сыйымдылығы 60000 құсқа арналған 6 бордақылау, инкубациялық, сою, қалдықтарды өңдеу цехтарынан және әкімшілік ғимаратынан тұратын фабрикада осы жылдың 13 қазанында инкубатордан алғашқы 57000 балапан шығарылып, бордақылау цехына орналастырылып, алғашқы өнім алу 15 қарашадан басталды.
Ақтөбе ауылдық округінің тұсындағы 25 га жерді алып жатқан құс фабрикасы іске қосылғаннан бері күніне 2000-2500 бас тауық сойылып, 3 күнде 10 тоннадан астам өнім дайындалған. Алдағы уақытта фабрика толық қарқын алып, жергілікті мамандар жұмыс үдерісін толық меңгергенде фабрика күніне 13-14 тонна өнім шығаратын болады деп күтілуде.
Қазіргі таңда 90 адам жұмыс істейтін фабрика жұмысшыларының басым бөлігі Ақтөбе ауылының тұрғындары болса, Ақжар мен Жосалы кентінен қосымша жұмысшы бригадаларымен қамтылған. Барлық цех толық жұмысқа қосылған уақытта жұмысшылар саны 115-120 адамға көбейеді деп күтілуде.
Мұнымен қоса, «Қармақшы құс» ЖШС директоры Нұрлан Тұрғанбекұлы құс шаруашылығы бойынша жемді қолжетімді бағада жеткізу үшін Ақтөбе ауылы мен Қызылорда қаласынан құрама жем зауытын салу мақсатында жұмыстар жүргізіліп жатқандығын жеткізді. Зауыт іске қосылса, құс шаруашылығымен айналысатын аймақ кәсіпкерлеріне де үлкен жеңілдік болары анық.
Сурет ашық дереккөзден алынды.
Пікірлер жоқ. Бірінші болыңыз!