Жапонияның 67 жастағы бұрынғы премьер-министрі Синдзо Абе Нара университетінің ауруханасында қайтыс болды. Оған Нара қаласында қастандық жасалған болатын, деп хабарлайды Kyodo News.
Айта кетсек, Синдзо Абэ Жапонияның премьер-министрі қызметін екі рет – 2006-2007 және 2012-2020 жылдары аралығында атқарды. Ол бұл қызметті ел тарихында ең ұзақ уақыт атқарған шенеунік болып есептеледі.
Естеріңізге сала кетейік, Нара қаласында көшеде бұрын өзі басқарған Либералды-демократиялық партияны қолдап, парламенттің жоғарғы палатасының сайлауалды науқаны аясында сөз сөйлеп тұрған Синдзо Абэге қастандық жасалған болатын.
Жараланған Синдзо Абэ шұғыл түрде тікұшақпен ауруханаға жеткізілген. Нара университетінің ауруханасы экс-премьердің өздеріне жеткізілгенін растаған.
Кейінірек бұқаралық ақпарат құралдары Синдзо Абэге оқ атқан адамның кім екені анықталғанын хабарлады. Күдікті – Нара қаласының тұрғыны Тэцуя Ямагами. Ол 2005 жылға дейін жапон теңіз флотының өзін-өзі қорғау күштерінде үш жыл қызмет еткен. Тұтқындау кезінде ер адам қарсылық көрсетпеген.
Одан бөлек, әлеуметтік желілерде саясаткерге қастандық жасалған сәтінен видеолар жарияланды.
Пікірлер жоқ. Бірінші болыңыз!