Жан-жағына жәутеңдеген жұрт Үкіметтен үмітін үзбей келеді. Егінмен егіз Қызылорда облысының шаруалары да биыл шарасыз қалып отыр. Сырдария суының тым тартылып кетуі егіске тегіс кесірлі болмақ. Аймақ басшысы Г.Әбдіқалықова мемлекет басшысы Қ.Тоқаевтың қабылдауына осы мәселені де ала барыпты. Орынды. Мәселені мезетінде қолға алмаса, қолымызды кеш сермеп те қалуымыз ғажап емес. Аграрлы аймақ абдырап қалмаса дейміз.
«Не айтты екен?» деген сауал көптің көкейінде екені рас. «Атқамінерлердің аузына қарап отырғанда уақыттан да ұтылып қалмаймыз ба?» деп те шаруалар сарыуайымның шырмауынан шыға алмай отыр. Президент қабылдауында облыс әкімі алдымен былтыр атқарған шаруалары турасында есеп берді. Оның айтуынша, облыстағы экономиканың негізгі көрсеткіштері саналатын өндірістік өнім көлемі – 0,8 пайызға, өңдеу өнеркәсібі – 14,5 пайызға, жеке инвестиция – 11,7 пайызға, сауда – 2,4 пайызға, пайдалануға берілген тұрғын үй – 8,6 пайызға, ал ауыл шаруашылығы өнімінің көлемі 0,3 пайызға артқан. Өңірде индустрияландыру бағдарламасының үшінші бесжылдығы аясында былтыр құны 45,2 миллиард теңге болатын 4 жоба жүзеге асырылып, 456 жұмыс орны ашылған. Көрсеткіштер көз қуантарлықтай, десек те экономиканың шаруасы шатқаяқтап тұрғанын жасыру мүмкін емес. Бізге құр есепті емес, нақты нәтижелерді мақтан қылатын уақыт келді.
Сондай-ақ, кездесу барысында облыс экономикасына тікелей әсер ететін негізгі проблемалық мәселелер талқыланды. Атап айтқанда, Сырдария өзені деңгейінің күрт төмендеуі, тауарлық газдың көтерме бағасы, тасымалдау тарифінің шығындары мен жергілікті газ үлесін арттыру және агроқұрылымдардағы жер дауы мәселелері туралы баяндалды. Қасым-Жомарт Тоқаев Қызылорда облысында атқарылып жатқан жұмыстарды саралай келе, Үкіметпен бірлесіп түйткілді мәселелерді шешу және қолға алынған жобаларды одан әрі жалғастыру жөнінде тапсырма берді. Мәселе патшаның құлағына тисе, аймақтың айы оңынан туып қалар деген дәме зор.
Сырдарияны сақтап қалу мақсатында қазір жүйелі жұмыстар басталды деген мәліметтер бар. Экология вице-министрі Серік Қожаниязов Душанбеде жұмыс сапары барысында Тәжікстан Республикасы Энергетика және су ресурстары министрінің орынбасары Шоимзода Джамшед Шодимен кездесу өткізді. Тараптар Сырдария өзені бассейніндегі қалыптасқан су шаруашылығы жағдайын талқылап, «Бахри Точик» су қоймасының 2021-2022 жылдардағы вегетацияаралық және 2022 жылғы вегетациялық кезеңдегі жұмыс режимін келісу бойынша келіссөздер жүргізді. Енді Қазақстан тарапы 2022 жылдың вегетациялық кезеңінде былтырғыдай «Бахри Точи» су қоймасынан қосымша су жіберу жүзеге асырылатын болады деген уағдаластыққа қол жеткізді. Бұйыртса, бұл өз кезегінде Түркістан және Қызылорда облыстарының фермерлерін су аз болған жағдайда суармалы сумен қамтамасыз етуді жақсартуға мүмкіндік береді дейді. Кесімді келіссөз болса, лайым оңынан шешілсін.
Ә.КЕНЖЕ
Пікірлер жоқ. Бірінші болыңыз!