FlyArystan әуе компаниясы 24 желтоқсаннан бастап Орал мен Дубай арасында тікелей әуе қатынасын іске қосуды жоспарлап отыр. Рейстер аптасына бір рет орындалады, деп хабарлайды Halyqline.kz.
Қазақстандық FlyArystan лоукостері халықаралық бағыттар желісін кеңейтіп, Орал – Дубай – Орал бағыты бойынша тікелей рейстер ашпақ. Жаңа бағыттың алғашқы ұшырылымы 2026 жылғы 24 желтоқсанға жоспарланған.
Ұсынылған ақпаратқа сәйкес, рейстер аптасына бір рет, бейсенбі күндері орындалады. Оралдан Дубайға ұшу билеттерінің бастапқы құны 65 мың теңгені, ал кері бағытта 66 мың теңгені құрайды.
Жаңа әуе қатынасы Батыс Қазақстан облысының тұрғындарына Біріккен Араб Әмірліктеріне басқа қалалар арқылы ауысып мінбей жетуге мүмкіндік береді. Бұл туристік сапарлармен қатар, іскерлік байланыстарды дамытуға да қолайлы жағдай жасайды.
Айта кетейік, FlyArystan бұған дейін Ақтау – Дубай – Ақтау бағытында тікелей рейстерді іске қосқан болатын. Әуе компаниясы халықаралық бағыттарды кеңейту арқылы жолаушыларға қолжетімді әуе қатынасын ұсынуды көздейді.
Билет бағасы сапар күніне, сұранысқа және таңдалған тарифке байланысты өзгеруі мүмкін. Жолаушылар ұшу кестесі мен билеттердің нақты құнын FlyArystan компаниясының ресми сайтынан тексере алады.
Пікірлер жоқ. Бірінші болыңыз!