Президент Қасым-Жомарт Тоқаев 14 қыркүйекте Корея Республикасына мемлекеттік сапармен барды. Сапар 16 қыркүйекке дейін жалғасады. Мемлекет басшысы Сеулге Корея Президенті Ли Чжэ Мённың шақыруымен барған.
Сапардың алғашқы күнінде Тоқаев БҰҰ-ның сегізінші Бас хатшысы, Жаһандық жасыл даму институтының төрағасы Пан Ги Мунмен кездесті. Тараптар тұрақты даму, климат мәселелері және Біріккен Ұлттар Ұйымын қазіргі жағдайға бейімдеу қажеттігін талқылады.
Сондай-ақ Қазақстан мен Корея арасындағы байланысты дамытуға үлес қосқан бес кореялық мемлекеттік және қоғам қайраткеріне II дәрежелі «Достық» ордені табысталды. Президент Кореяны Қазақстанның маңызды стратегиялық серіктестерінің бірі деп атап, екі елдің машина жасау, энергетика, металлургия және жоғары технологиялар саласындағы байланысына тоқталды.
Мемлекеттік сапар аясында алғашқы нақты келісімдер де жасала бастады. Қазақстанның Денсаулық сақтау министрлігі мен Kyungdong Pharmaceutical компаниясы фармацевтика саласындағы ынтымақтастық туралы меморандумға қол қойды. Құжат Қазақстанда дәрі-дәрмек өндірісін жолға қою, технология трансфері, келісімшарттық өндіріс және бірлескен кәсіпорын құру мүмкіндігін қарастырады.
15 қыркүйекте Тоқаев пен Ли Чжэ Мённың жоғары деңгейдегі келіссөздері өтеді. Күн тәртібінде сауда мен экономика, энергетика, маңызды минералдар, жасанды интеллект, ғылым мен технология, сондай-ақ мәдени және гуманитарлық байланыстар бар. Келіссөз қорытындысында Қазақстан мен Корея арасындағы қарым-қатынасты «болашаққа бағдарланған жан-жақты стратегиялық серіктестік» деңгейіне көтеру жоспарланған. Екі Президенттің қатысуымен 13 меморандум алмасу рәсімі де көзделіп отыр.
Бұл сапарда сирек және маңызды минералдар мәселесіне ерекше мән беріліп отыр. Корея технологиялық өндіріс үшін қажетті шикізат жеткізу тізбегін әртараптандыруға мүдделі болса, Қазақстан шикізатты тек экспорттап қана қоймай, оны өңдеу мен жоғары қосылған құны бар өндірістерді ел ішінде дамытуға қызығушылық танытып отыр. Жасанды интеллект пен жоғары технологиялар да ынтымақтастықтың жаңа бағыттарының қатарына кірген.
16 қыркүйекте Тоқаев Сеулде өтетін алғашқы «Орталық Азия – Корея Республикасы» саммитіне қатысады. Оған Қазақстан, Қырғызстан, Өзбекстан, Тәжікстан және Түрікменстан басшылары қатысады. Кездесуде сауда, инвестиция, энергетика, маңызды минералдар мен жеткізу тізбектерін дамыту мәселелері қаралады. Саммит қорытындысында ұзақ мерзімді өңірлік ынтымақтастықтың бағыттарын айқындайтын Сеул декларациясын қабылдау жоспарланған.
Осылайша, Тоқаевтың Кореяға мемлекеттік сапары дәстүрлі сауда мен инвестициядан бөлек, жасанды интеллект, жоғары технология, фармацевтика және маңызды минералдар секілді жаңа бағыттарға басымдық беріп отыр. Сапардың негізгі қорытындылары 15–16 қыркүйектегі келіссөздер мен саммиттен кейін белгілі болады.
Пікірлер жоқ. Бірінші болыңыз!